Read Ngaju MASMUR 56 Bible Online

MASMUR 56 - Ngaju bible

MASMUR 56

¹ Akan pamimpin koor. Manumon lagu: burong dara je pambenyem, bara eka je kejau. Masmur Dawid katika oloh Pilistin manawan ie intu Gat.

²Pasi aku, o Hatalla, awi aku inyarang, raju-rajur aku inindas musohku.

³Hapus andau aku ihunje-inandik musohku; are je mamusoh aku, o Hatalla Ije Pangkahai.

⁴Katika aku mikeh, aku harap Ikau.

⁵Aku manara Hatalla tagal taloh je injanji Awie; aku percaya Dengae, maka aku dia mikeh, oloh dia olih malawan aku.

⁶Hapus andau musoh manderoh urusangku, raju-rajur ewen handak mancalaka aku.

⁷Ewen hakarimbong intu eka je basahokan, mangalati uras taloh je iawiku, tuntang manggau hila akan mampatei aku.

⁸En aton salamat akan kapapan ewen? Keleh mambinasa ewen hong kasangit Aim, o Hatalla!

⁹Ikau mise kare andau panamueiku, tuntang katawan jumlah johon matangku. En dia ikau mitong jete?

¹⁰Hong andau aku mantehau Ikau, musoh kareh imukul mundur, awi akukatawan Hatalla mamihak aku.

¹¹Aku manara TUHAN, Hatalla, tagal taloh je injanji Awie.

¹²Aku percaya Dengae, maka aku dia mikeh, olon dia olih malawan aku.

¹³Aku kareh manggenep janjingku dengan Hatalla, tuntang maluput parapah tarimakasih Akam.

¹⁴Awi Ikau maliwus aku bara pampatei, aku injaga Awim uka dia balawo. Palus aku tau belom hong kalindong ain Hatalla, hong kalawan Aie je mampalawa uras kare taloh belom.