Read Ngaju MASMUR 57 Bible Online

MASMUR 57 - Ngaju bible

MASMUR 57

¹ Akan pamimpin koor. Manumon lagu: Ela mampalomos. Masmur bara Dawid, katika ie hadari akan huang guha awie mahakan Saul.

²Pasi aku, o Hatalla, pasi aku, awi Ikau eka kalindongku. Hong kanjungen palapas Aim aku manyahokan, sampai riwut barat je mamok terai.

³Aku mantehau Hatalla Je Pangkahai, akan Hatalla je malalus gawi akangku.

⁴Bara sorga Ie tombah tuntang manyalamat aku; Ie mampakalah kare oloh je manindas aku. Hatalla kareh mamparahan je Ie baketep dengangku, tuntang harajur sinta aku.

⁵Aku ingapong awi musoh, ewen kilau singa panguman olon. Kasingan ewen kilau lunju tuntang panah, jelan ewen kilau padang je banyihi.

⁶O Hatalla, parahan kahain Aim intu langit, tuntang kahalap kahain Aim intu hapus kalunen.

⁷Musohku manenan jarat akangku, tuntang mangapehe hambaruangku. Ewen mangali lowang intu jalangku, tapi ewen kabuat manjato akan huange.

⁸Aku himat percaya, o Hatalla, aku himat percaya, aku nahuang manyanyi tuntang manara Aram.

⁹Misik, o hambaruangku! Misik, o gambus tuntang kacapi! Aku nahuang mampisik andau sawah.

¹⁰TUHAN, aku handak manarimakasih intu Ikau marak kare bangsa. Aku handak manyanyi tara Akam marak olon kalunen.

¹¹Awi sintan Aim hai sampai intu langit, tuntang kaketepm sampai kare baunandau.

¹²O Hatalla, parahan kahain Aim intu langit, tuntang kahalap kahain Ayum intu hapus kalunen.