Read Ngaju MASMUR 59 Bible Online

MASMUR 59 - Ngaju bible

MASMUR 59

¹ Akan pamimpin koor. Manumon lagu: Ela mampalomos. Masmur Dawid, katika Saul manyoho oloh mangalati humae akan mampatei ie.

²O Hatallangku, nyalamat aku bara kare musohku, kalindong aku bara kare oloh je manyarang aku.

³Keleh malapas aku bara kare oloh je mawi kapapa, paliwus aku bara kare pamuno.

⁴Ite, ewen mimpa handak mampatei aku, kare oloh je tulas pakat malawan aku; padahal dia awi aku mawi dosa atawa mawi palanggaran, o TUHAN.

⁵Dia kea awi kasalangku, ewen kaje-kajeng tuntang tata-tatap.

⁶Keleh harikas, Hatalla Je Pangkahai, dohop aku. O Hatallan Israel, ite kabuat. Keleh misik tuntang hukum kare bangsa, ela masi oloh papa je mandarhaka.

⁷Metoh sanja ewen haluli, mangareheng kilau aso sambil mangaliling kota.

⁸Ewen harajur manyindir tuntang manawah; kare auh ewen banyihi kilau padang, nyewut ewen jaton je mahininge.

⁹Tapi Ikau mananture ewen, o TUHAN, uras bangsa te ihalalea Awim.

¹⁰Ikau kaabasku, aku harap Dengam, Ikau eka kalindongku, o TUHAN.

¹¹Awi kahalap Ayue Hatallangku manalih aku, Ie manalua aku mite musohku impakalah.

¹²Ela mampatei ewen, o TUHAN, uka bangsaku ela kalapean. Keleh mamisah darai tuntang pakalah ewen hapan kuasan Aim, o TUHAN je mangalindong ikei.

¹³Awi ewen badosa dengan kare auh ewen; nauhe ewen buah jarat huang kajohoe, awi ewen rajin manyapa tuntang mananjaro.

¹⁴Palomos ewen huang kasangit Aim, o Hatalla, keleh mambinasa ewen sampai lepah. Palus genep biti katawan je Hatalla marentah Israel, tuntang pamarentah Ayue tayap hapus petak.

¹⁵Hong katika sasanja ewen haluli, mangareheng kilau aso mangaliling kota.

¹⁶Ewen mangumbang lewu manggau panginae, tuntang mangang amon dia besoh.

¹⁷Tapi aku manyanyi tahiu kaabas Aim; genep hanjewu aku manyanyi hai auhku tahiu sinta tuntang kaketep Aim. Awi Ikau ekaku babuhau, eka kalindongku katika kasusah.

¹⁸O Hatalla, kaabasku, aku manyanyi auh kare tara akam, awi Ikau wei eka kalindongku, o Hatalla, eka sintangku.