Read Ngaju MASMUR 65 Bible Online

MASMUR 65 - Ngaju bible

MASMUR 65

¹Akan pamimpin koor. Masmur Dawid. Nyanyi.

²Puna patut ikei manara Ikau intu Sion, o Hatalla, tuntang manggenep janjin ikei Dengam.

³Awi Ikau je manarima lakudoa; uras oloh manalih Ikau awi jari badosa.

⁴Kare dosangku paham babehat akangku, tapi Ikau mampun jete.

⁵Salamat oloh je intih Awim, tuntang intehau Awim mangat melai intu Humam. Ikei kareh imbesoh dengan kare taloh je bahalap intu Humam, ekam melai je barasih.

⁶Ikau tombah auh ikei awim manenga akan ikei kamanang, Ikau mawi kare taloh heran hapa maliwus ikei! Ikau eka kaharap kakare bangsa, sampai intu tasik je kejau.

⁷Hapan kaabas Aim Ikau mampendeng kare bukit, akan mamprahan kuasan Aim je abas.

⁸Ikau mampataduh gotok tasik tuntang amok galombang, tuntang Ikau mampatende karidun kare bangsa.

⁹Uras oloh hunjun petak mikeh tuntang hormat mite kare gawin Aim je tamam. Hapus petak bara saran silae akan saran silae Iawim basasurak hanjak.

¹⁰Petak te ihaga Awim tuntang inenga Awim ujan, Ikau mawie bajewong sampai hasile malabien. Kare sungei ingontep Awim dengan danum, inyadia Awim gandom akan ewen, yoh, kalote ikau manyadiae.

¹¹Ikau mananum pihit lukue tuntang Ikau mambinasa kare gumpal petake. Ikau mawie harewoh dengan ujan, tuntang Ikau mananggong kare salundike lembut bajewong.

¹²Awi kahalap Aim, genep nyelo Ikau manyadia taloh je getem; hong kueh ikau dumah, aton hasil je malabien.

¹³Padang pasir kontep kambing tabiri, uras kare bukite hanjak rantang.

¹⁴Kare padang oru hakahowut tabiri, kare janah kontep dengan gandom. Uras basurak tuntang manyanyi dengan kahanjak.