Read Ngaju MASMUR 66 Bible Online

MASMUR 66 - Ngaju bible

MASMUR 66

¹Akan pamimpin koor. Ije nyanyi. Keleh basasurak akan Hatalla, o hapus kalunen!

²Nyanyi tuntang pahai Arae, pahai Ie dengan auh tara.

³Suman akan Hatalla, “Toto heran kare gawin Aim! Musoh mamenda Ikau kontep kikeh, awi hai toto kuasan Aim.

⁴Hapus kalunen sontop manyembah Ikau, ewen manyanyi manara Aram.”

⁵Talih tuntang ite gawin Hatalla, toto heran gawie marak olon!

⁶ Ie mawi tasik jadi petak keang, tato hiang ikei dimpah awie mananjong hapanpai. Palus ikei hanjak awi gawin Aie.

⁷Ie marentah dengan kamenteng palus katatahie. Kare bangsa inantuani Awie, mangat pambarontak dia olih bajoho Dengae.

⁸Tara akan Hatallan ikei, o kare bangsa, ambo auh tara ain keton Akae!

⁹Ie jari mahaga ikei uka tetep belom tuntang dia manalua ikei manjato.

¹⁰O Hatalla Ikau jari manara ikei sama kilau oloh je mamparasih perak hapan apui.

¹¹Ikau manalua ikei manjato akan parangkep tuntang Ikau manenga tanggongan je babehat toto.

¹²Ikau manalua ikei ihunje-inandik awi musoh; ikei mahalau danum soho tuntang apui. Tapi toh ikei jari imbit Awim akan eka kapanatau.

¹³Aku kareh mimbit parapah je ingehu akan Human Ayum tuntang manggenep janjingku Dengam,

¹⁴janji je ungotakku katika aku huang kasusah.

¹⁵Iluputku akam parapah je ingehu bara meto paintih, kambing tabiri tuntang sapi hatue, asepe mandai akan langit.

¹⁶Keleh dumah tuntang seneh, o hapus oloh panumon, aku handak manyarita taloh je iawi Hatalla akangku.

¹⁷Aku jari mantehau Ie balaku dohop; toh aku manyanyi tara Akae.

¹⁸Paribae aku sanang manirok kapapa, batantu TUHAN dia maku mahining.

¹⁹Tapi Hatalla jari mahining auhku, ie manarima palakungku.

²⁰Aku manara aran Hatalla awi Ie dia manolak lakudoangku, tuntang dia terai sinta dengangku.