Read Ngaju MASMUR 68 Bible Online

MASMUR 68 - Ngaju bible

MASMUR 68

¹Akam pamimpin koor. Masmur Dawid.

²Hatalla harikas mamisah-darai musoh Aie, oloh je basingi Dengae hadari bara hila Baue.

³Hatalla maharak ewen haguet, kilau asep je ihimun palus nihau. Kilau lilin je lenyoh hong apui, kalote oloh papa nihau intu taharep Hatalla.

⁴Tapi oloh barasih hanjak rantang, ewen basura-surak hanjak intu taharep Hatalla.

⁵Nyanyi akan Hatalla, tara Arae, natap jalan lombah akae je lumpat baunandau Aran Aie te TUHAN — keleh sana-sanang intu taharep Ie!

⁶Hatalla je melai intu Human Aie je barasih iete bapa anak nole tuntang pambela kare balo.

⁷Hatalla manenga eka melai akan oloh je ungi-ungin. Ie maliwus oloh tahanan sampai ewen sanang. Tapi kare oloh je malawan TUHAN musti melai intu petak keang kamahau.

⁸O Hatalla, katika Ikau mangagalan ungkup Aim mananjong mahalau janah je keang,

⁹ petak hagenjeh, ujan batusoh intu hila Baum, awi panumah Hatallan Sinai,[32] Hatallan Israel.

¹⁰Dengan kapehese Ikau manusoh ujan labat je mahalalian petak Aim je keang kamahau.

¹¹Palus ungkup Ayum melai intu hete, huang kahalap Aim, o Hatalla, Ikau mahaga oloh je belom susah.

¹²TUHAN manenga putusan, palus kare oloh bawi mimbit barita:

¹³“Kare raja tuntang pasukae jari hadari!” Ewen hadari sama kilau burong dara je tarawang haguet. Kare oloh bawi intu huma mambagi-bagi perak tuntang amas je ilihi. Aloh are je dia omba parang, ungkup Hatalla jari dinon kamanang.

¹⁵Katika Je Jaton Tikas Kuasae mamisah-darai kare raja intu hete, salju mohon bara bukit Salmon.

¹⁶Gunung Basan te bukit je tamam, bukit je are tantae.

¹⁷Mbuhen bara tantae je are te ikau nanture dengan kabeho manintu Bukit Sion[33] je intih Hatalla akan ekae melai? TUHAN kareh melai intu hete palus katatahie.

¹⁸Dengan bapuluh koyan kareta abas Hatalla babala marak ewen dengan Kahaie.

¹⁹ TUHAN mandai akan eka je gantong; are tawanan imbit Awie. Ie manarima parapah bara marak olon bara marak kare pambarontak haream; uka ewen melai dengan TUHAN, Hatalla.

²⁰Tara TUHAN, awi ie Hatalla je manyalamat itah; nongkang andau Ie meton tanggongan itah.

²¹Hatallan itah te TUHAN je manyalamat, Ie maliwus itah bara pampatei.

²²Hatalla pasti kareh mamparotek takolok musoh Aie, kare oloh je harajur belom hong dosa.

²³Koan TUHAN, “O ungkup-Ku, Aku mimbit musohm bara Basan Aku mimbit ewen haluli bara penda tasik,

²⁴mangat keton menyau pain keton hapan dahan ewen, tuntang kare aso manjelape salepah belaie.”

²⁵Uras mite pawai kamanang Aim, o Hatalla, Hatallangku, Rajangku, iarak akan Ekae melai.

²⁶Intu hila baun kare panyanyi mananjong, intu likut kare pamain kacapi; intu bentok kare oloh bawi je mampahiau tarabang; kalutoh auh nyanyin ewen:

²⁷“Tara akan Hatalla intu bentok pumpong ungkup Ayue, tara TUHAN, o hapus turonan Yakob!”

²⁸Benyamin, suku je pangkakorike, keleh mananjong intu hila baun, palus bara-boho kare pamuka Yuda, intu likote kare pamuka Sebulon tuntang Naptali.

²⁹Hatallam balaku kaabasm; o Hatalla, padehen taloh je jari Awim akan ikei.

³⁰Kare raja mimbit parapah Akam intu Humam hong Yerusalem.

³¹Keleh malait Misir, meto basiak te marak purun. Tingak kare bangsa, kawan banting te dengan kare anake, je hulit uka mandino perak. Hatalla mamisah-darai kare bangsa je rajin parang.

³²Kare oloh hai bara Misir dumah mimbit tambaga; oloh Sudan kajeng kiso mimbit upeti akan Hatalla.

³³Nyanyi akan Hatalla, o kare karajaan, nyanyi auh tara akan TUHAN,

³⁴Akae je mahalau langit je bara jaman horan. Hining! TUHAN hakotak, auh Aie halegar hai hayak tamam.

³⁵Keleh mangaku kuasam Hatalla je manguasa Israel, kuasan Aie sampai intu langit.

³⁶Toto heran Hatallan itah katika Ie balua bara Ekae melai Hatallan Israel manenga kuasa tuntang kaabas akan ungkup Ayue. Tara akan Hatalla!