Read Ngaju MASMUR 69 Bible Online

MASMUR 69 - Ngaju bible

MASMUR 69

¹Akan pamimpin koor. Manumon lagu: Kambang Bakung. Bara Dawid.

²Keleh manyalamat aku, o Hatalla, awi danum jari mandai sampai uyatku.

³Aku tambohos akan luau je handalem, jaton eka batahanan. Aku leteng intu danum je handalem, inamput awi galombang pasang.

⁴Aku mantehau sampai heka tuntang balengkongku keang. Matangku bakarah mendeh pandohop Hatallangku.

⁵ Oloh je basingi dengangku jaton bara sabab, labih are bara balau intu takolokku. Kare oloh abas handak mambinasa aku; ewen manyarang aku dengan auh mamapa Aku imaksa malian panatau je irabutku.

⁶O Hatalla Ikau katawan kare kasalangku dosangku dia basahokan bara Ikau.

⁷Ela nalua aku mimbit kahawen akan kare oloh je harap Dengam, o TUHAN, Hatalla Je Jaton Tikas Kuasae. Ela nalua aku manawah oloh je manyembah Ikau, o Hatallan Israel!

⁸Karana tagal Ikau aku inawah, tagal Ikau aku imapa.

⁹Aku jadi kilau oloh kuar akan tundah paharingku kilau oloh luar akan kaka-andiku.

¹⁰ Ateiku mangambuar tagal sinta dengan Humam, auh halalea oloh mawi Ikau jari buah aku.

¹¹Aku jadi kilau oloh luar akan tundah paharingku, kilau oloh luar akan kare andiku.

¹²Aku hatapih karung tanda kapehe atei. tapi ewen manyindir aku.

¹³Aku jadi tahiun oloh hong eka oloh hapumpong. tuntang nyanyin kare oloh pambusau jete tahiu aku.

¹⁴Tapi aku balakudoa intu Ikau, o TUHAN, o Hatalla, keleh tombah auhku hong katika je buah. Dohop aku awi Asim je hai tuntang awi kaketep Aim.

¹⁵Ela manalua aku leteng akan huang luau, nyalamat aku bara kare oloh je basingi dengangku, tuntang bara danum je handalem.

¹⁶Ela nalua aku inamput galombang pasang, tuntang leteng intu penda tasik atawa ingubur huang lowang.

¹⁷Keleh tombah auhku, o TUHAN, awi ikau bahalap tuntang tetep sinta. Keleh mules talih aku tagal Sintam Asim.

¹⁸Ela masahokan bitin Aim bara rewar Aim toh, awi aku susah, keleh bajeleng mandohop aku.

¹⁹Keleh kantoh manyalamat aku, paliwus aku bara kare musohku.

²⁰Ikau katawan kapaham aku imapa, inawah tuntang ihenyek, Ikau mite uras musohku.

²¹Auh tawah jari mawi aku bagalabah, tuntang aku bageto kaharap. Aku manggaung sinta asi, tapi hayang bewei, Aku manggaung pamampong, tapi aku dia mandino.

²² Akangku inenga pulih haream indu kinangku; katika teah belai akangku inenga cuka akan indu ihop.

²³ Nauhe pesta ain ewen mawi calaka, tuntang mawi jabak akan kare oloh je maja ewen.

²⁴Nauhe matan ewen babute tuntang tulang likut ewen harajur balemo.

²⁵Keleh manampuhak kasangit Aim dengan ewen, nauhe ewen buah kalait Aim je hasep.

²⁶ Nauhe eka kare kemah ewen tunis benyem, tuntang kare kemah ewen jaton oloe.

²⁷Awi ewen mangapehe oloh je ihukum Awim. tuntang manahiu kare oloh je ingapehe Awim.

²⁸Nauhe kasalan ewen sasar are; ela mambujur gawin ewen.

²⁹ Nauhe aran ewen ingudap bara buku ain oloh belom, tuntang dia inyurat huang daptar aran oloh bujur ateie.

³⁰Tapi aku tatindas tuntang kapehe, gatang aku, o Hatalla, tuntang nyalamat aku.

³¹Palus aku kareh manara Hatalla dengan nyanyi, mampahai Ie dengan nyanyi tarimakasih.

³²Jete labih ingilak TUHAN bara parapah sapi, parapah sapi hatue je hai.

³³Mite jete, oloh tatindas hanjak, oloh je manyembah Hatalla sanang ateie.

³⁴Awi TUHAN mahining oloh je belom susah; ie dia manalua ungkup Ayue intu panjara.

³⁵Tara akan Hatalla, o langit tuntang petak, tasik tuntang kare taloh belom awang huange.

³⁶Ie kareh manyalamat Yerusalem tuntang mamangun haluli kota Yuda. Ungkup TUHAN kareh melai intu hete; petak te jadi ayun ewen.

³⁷Anak esoe kareh mawaris jete; kare oloh je sinta dengan TUHAN kareh melaiah.