Read Ngaju MASMUR 71 Bible Online

MASMUR 71 - Ngaju bible

MASMUR 71

¹Ikau eka kalindongku, o TUHAN, ela manalua aku impahawen.

²Keleh maliwus aku awi Ikau adil keleh mahining tuntang nyalamat aku.

³Keleh Ikau jadi bukit batu akangku eka aku melai, je harajur murah aku manyampaie. Awi Ikau jari manukas uka manyalamat aku Ikau ekaku bakalindong tuntang bakanjungen.

⁴Hatallangku, keleh paliwus aku bara oloh papa, bara kuasan kare oloh karas tuntang tulas.

⁵Awi Ikau eka kaharapku, o TUHAN, TUHAN, aku percaya Dengam, bara katabelangku.

⁶Hapus pambelomku aku bahimbing Dengam, Ikau mangalindong aku[34] bara katika aku inakan, maka aku harajur manara Aram.

⁷Pambelomku jadi sonto akan oloh are awi Ikau wei eka kalindongku je abas.

⁸Aku harajur manara Aram, hapus andau aku mambarita Kahaim.

⁹Ela ah Ikau manganan aku huang andau kabakasku ela malihi aku amon kaabasku jari lepah.

¹⁰Awi kare musohku manahiu aku, kare oloh je handak mampatei aku pakat.

¹¹Koan ewen, “Ie jari ilihi Hatalla; ayo itah manggoang tuntang manawan ie awi jaton je manyalamat ie.”

¹²Ela Ikau kejau bara aku o Hatalla, Hatallangku dohop aku bajeleng.

¹³Nauhe oloh je manyarang aku impahawen tuntang inganan. Nauhe je nahuang mancalaka aku bingung tuntang kontep kahina.

¹⁴Tapi aku kareh harajur harap Dengam, tuntang sasar kinjap manara Aram.

¹⁵Hapus andau kareh aku manyarita kare gawim je adil, tuntang salamat bara Ikau je dia taraise.

¹⁶Aku manara gawin Aim je menteng, o TUHAN, Hatalla, aku mambarita kaadil Ayum, kaadil Ayum bewei.

¹⁷O Hatalla, Ikau majar aku bara katabelangku, sampai toh aku manyarita gawim je heran.

¹⁸O Hatalla, ela malihi aku, sampai aku bakas tuntang huwan, mangat aku mambarita kuasa tuntang kamenteng Aim. akan hapus turonan je kareh dumah.

¹⁹O Hatalla, kaadil Ayum kambo langit; puna hai kakare gawim; eweh olih manyama Ikau?

²⁰Ikau manenga akangku are kapehe je babehat, tapi Ikau kareh mahalalian kaabasku tuntang mampisik aku bara kubur.

²¹Ikau kareh mawi aku labih ihormat, tuntang mampong aku tinai.

²²Aku handak manara Aram hapan gambus awi Ikau baketep o Hatallangku. Aku nahuang manyanyi tara Akam dengan kacapi, O Hatalla je barasih ain Israel.

²³Aku basasurak kontep kahanjak sambil manyanyi tara Akam. Biti berengku manyanyi dengan kahanjak, awi Ikau jari manyalamat aku.

²⁴Hapus andau kareh aku mambarita kaadil Ayum, awi kare oloh je handak mancalaka aku jari impakalah tuntang impahawen.