Read Ngaju MASMUR 77 Bible Online

MASMUR 77 - Ngaju bible

MASMUR 77

¹Akan pamimpin koor. Manumon: Yedutun. Masmur Asap.

²Dengan hai auh aku mantehau Hatalla; dengan hai auh aku mantehau, tuntang Ie mahining aku.

³Intu katika kajake aku balakudoa intu TUHAN; hapus alem aku manggatang lengengku Akae dia peda, tapi ateiku dia maku iampong.

⁴Amon aku mingat Hatalla aku mungoh, amon aku mangumang ateiku sasar heka.

⁵TUHAN mawi aku dia tau batiroh hamalem, aku balisah sampai dia olih bapander.

⁶Inirokku kare andau je jari halau, iingat tuntang ingumangku kare nyelo je jadi.

⁷Hamalem aku mangenang, tuntang misek huang atei,

⁸“En sampai katatahie TUHAN manolak? Tuntang dia mangilak hindai?

⁹En Ie jari terai masi ikei? En Ie dia tinai malalus janjin Aie?

¹⁰En jari kalapean Hatalla uka masi? En Ie sangit sampai dia masi hindai?”

¹¹Palus aku hamauh, “Jetoh ie je mangapehe ateiku, iete Je Pangkahai dia bakuasa tinai.”[40]

¹²Aku nahuang mingat kare gawin Aim TUHAN, mangenang kare taloh heran Ayum horan.

¹³Aku nahuang mangumang uras je Awim, tuntang manirok kare gawin Aim je tamam.

¹⁴O Hatalla, kare gawin Aim barasih, eweh je kahaie kilau Hatallan ikei?

¹⁵Ikau Hatalla je malalus taloh heran, kuasan Aim jari imparahan marak kare bangsa.

¹⁶hapan kaabas Aim Ikau maliwus ungkup Aim, turonan Yakob tuntang Yosep.

¹⁷Mite Ikau, o Hatalla, danum mikeh, yoh penda tasik kea hagenjeh.

¹⁸Baunandau manusoh ujan, nyaho manggoruh; kilat manyambar akan hete-hete.

¹⁹Nyaho mangaruntong, kilat mamancar, petak hagolak tuntang hagerek.

²⁰Ikau mananjong mahoroi galombang, mangombang tasik, tapi baunandau Paim dia gitan.

²¹Kilau sakatik Ikau mangagalan ungkup Aim, mahalau Moses tuntang Aron.