Read Ngaju MASMUR 78 Bible Online

MASMUR 78 - Ngaju bible

MASMUR 78

¹Nyanyi auh ajar Asap. Hining auh ajarku, o bangsa ayungku, nantuneng kare auhku.

² Aku handak mansanan auh tanding tuntang paribasa, tuntang manarang lelei jaman horan,

³kare taloh je ihining tuntang inarima ikei, je inyarita awi tato hiang ikei.

⁴Ikei dia nahuang milime bara kare anak ikei; ikei handak mambrita akan pangereng je rahian tahiu kuasan TUHAN tuntang kare gawin Aie je hai, tuntang kare gawin Aie je heran.

⁵Akan bangsa Israel ikei manenga hukum Ayue, tuntang akan turonan Yakob parentah Ayue. Ie manyoho tato hiang itah manyarah akan kare anak ewen,

⁶uka angkatan je rahian kasene Ie, palus manontonge akan kare anak ewen.

⁷Tumon te ewen kea mina kaharape intu Hatalla, tuntang dia mangalapean gawin Aie, tapi harajur manumon parentah Ayue,

⁸uka ewen dia kilau tato hiang ewen je rajin mambrontak tuntang mandarhaka; angkatan je hongge kapercayaa tuntang dia baketep dengan Hatalla.

⁹Suku Epraim je hapan sanjata panah tuntang busur, mandari arepe katika parang.

¹⁰Ewen malanggar janjin Hatalla dengan ewen tuntang dia maku manumon hukum Ayue.

¹¹Ewen kalapean dengan kare gawin Aie, tuntang kare taloh heran je imparahan Awie akan ewen.

¹² Intu taharep tato hiang ewen Hatalla mawi taloh heran intu lewu Misir, hong tanah Soan.

¹³ Ie manyila tasik, palus mampadimpah ewen; danum impendeng Awie kilau dam.

¹⁴ Ie mangagalan ewen dengan baunandau amon handau tuntang dengan kalawan apui hapus alem.

¹⁵ Ie manising bukit batu intu gurun tuntang mampihop ewen sakare-karee.

¹⁶Bukit batu inyoho Awie mampalua danum, palus mahasor danum kilau sungei.

¹⁷Tapi ewen tarus badosa dengan Hatalla, intu padang pasir ewen mambrontak malawan Ie Je Pangkahai.

¹⁸ Tantai ihat ewen mancoba Hatalla, dengan balaku panginan tumon kanahuang ewen.

¹⁹Ewen malawan Hatalla dengan hamauh, “En olih Hatalla mampakan itah intu padang pasir?

²⁰Puna Ie mamukul gunung batu je batekang, sampai danum mahasor hayak badehes. Tapi en olih kea Ie manyadia rote tuntang manenga daging akan ungkup Ayue?”

²¹Mahining te, Hatalla sangit tuntang manyarang ungkup Ayue hapan apui; kasangit Aie dengan ewen sasar paham,

²²awi ewen dia percaya dengan Hatalla, dengan kuasan Aie je olih manyalamat ewen.

²³Aloh kalote ie marentah langit uka muap kare bauntonggang.

²⁴ Ie mampamohon gandom bara sorga, manhu[41] akan panginan ewen.

²⁵Ie manenga akan ewen panginan je hakutoh; ewen kuman rute ain malekat.

²⁶Ie kea manyoho riwut timor manampur; awi kuasan Aie riwut salatan mangewus.

²⁷Ie mampamohon kare burong akan ungkup Ayue, karee kilau baras dia taraise.

²⁸Impajato Awie kare burong te akan eka kare kemah intu hakaliling eka ewen melai.

²⁹Palus ewen kuman sampai besoh, awi Hatalla jari manenga taloh kanahuang ewen.

³⁰Tapi kipen ewen hindai kea ombet; palus pandehan ewen magon kuman,

³¹Hatalla balait tuntang malawan ewen; Ie mampatei kare oloh Israel je tabela tuntang menteng.

³²Aloh kalote ungkup Ayue tetep badosa, kare taloh heran je Iawie dia mawi ewen percaya.

³³Palus Hatalla mahapus pambelom ewen kilau tahaseng, kare nyelon ewen lepah hong kikeh.

³⁴Genep katika Hatalla mampatei pire-pire biti marak ewen, je beken manyasal tuntang haluli Dengae.

³⁵Ewen mingat je Hatalla pangalindong ewen tuntang Je Pangkahai panyalamat ewen.

³⁶Tapi ewen mananjaro Ie, kare auh ewen uras tanjaro,

³⁷ Ewen dia baketep Dengae tuntang dia mimbing janjin Aie.

³⁸Tapi Hatalla masi tuntang mampun ungkup Ayue, tuntang dia mambinasa ewen. Kinjap Ie manyarenen kasangit, tuntang Ie dia manusoh kalait Ayue.

³⁹Ie mingat je ewen baya taloh belom pandehan bewei, kilau riwut je mahalau tuntang dia haluli.

⁴⁰Kinjap toto ewen mambarontak malawan Ie, tuntang mangapehe Ateie katika intu padang pasir.

⁴¹Lula-luli ewen mancoba Hatalla, manyusah Je Barasih, Hatalla Israel.

⁴²Ewen dia mingat kuasan Aie, andau Ie maliwus ewen bara musoh

⁴³katika Ie mawi kare taloh heran intu Misir, tuntang kare kota intu Soan.

⁴⁴ Kare sungei ewen iobah Awie jadi daha, sampai ewen dia tau mihop danume.

⁴⁵ Ie mangapehe ewen hapan langau je are tuntang manalua petak ewen impalomos bakatak.

⁴⁶ Ie mampadumah uret tuntang sangkalap, je mampalepah hasil tana.

⁴⁷ Ie marusak batang anggor ewen dengan ujan batu tuntang kare uponara ewen dengan ambon baku.

⁴⁸Ie manalua ujan es mantakan meto ain ewen, tuntang nyaro[42] manyambar kare taloh je imbelom ewen te.

⁴⁹Ie manusoh kasangit Aie je ganda-gandang dengan manyoho ije pasukan malekat mampatei je mawi ewen bageto kaharap.

⁵⁰Ie dia manahan kalait Aie atawa manyayang pambelom ewen, tapi mambinasa ewen hapan panyakit pes.

⁵¹ Ie mampatei anak hatue je tambakas hong genep keluarga ain oloh Misir.

⁵² Palus Ie mamimpin ungkup Ayue kilau kawan tabiri, tuntang mangagalan ewen mahalau padang pasir.

⁵³ Huang lengen Aie ewen sanang tuntang dia mikeh, tapi musoh ewen leteng intu tasik.

⁵⁴ Palus ungkup Ayue imbit Awie akan tanah je barasih, akan eka kare bukit gantong je irabut Awie kabuat.

⁵⁵ Intu baun ungkup Ayue Ie maharak panduduk intu hete palus Ie mambagi-bagi lewu te akan uras suku bangsa Israel ungkup Ayue, sampai ewen tau melai kare kemah musoh.

⁵⁶ Tapi ewen mambarontak tuntang mancoba Hatalla Je Pangkahai, kare parentah Ayue dia inumon awi ewen.

⁵⁷Ewen mandarhaka kilau tato hiang ewen, tuntang dia olih imercaya kilau panah je kalok.

⁵⁸Ewen manantang Hatalla dengan awie manyembah hampatong dewa, tuntang mawi kabehon Hatalla dengan kare hampatong ewen.

⁵⁹Nampayah te, Hatalla paham balait, tuntang manolak ewen samainde.

⁶⁰ Ie malihi kemah Ayue intu Silo,[43] eka Ayue melai hong marak olon.

⁶¹ Ie manalua Patin Janji Ayue inawan; tanda kahain Aie irabut musoh.

⁶²Ie balait dengan ungkup Ayue, ramon pusaka Ayue, ie manalua ewen impatei hapan padang.

⁶³Kare oloh tabela ain ewen kinan apui; jaton je kawin dengan kare bawin ewen.

⁶⁴Kare imam ewen impatei hapan padang, kare balo ain ewen dia olih manatum.

⁶⁵Palus TUHAN harikas kilau oloh misik batiroh, kilau oloh abas limbah mihop anggor.

⁶⁶Ie mamukul mundur musoh Aie, tuntang mampakalah ewen katatahie.

⁶⁷Tapi ie manolak turonan Yosep tuntang dia mintih suku Epraim.

⁶⁸Je intih Awie iete suku Yuda, tuntang bukit Sion je inyinta Awie.

⁶⁹Ie mamangun Huma Ayue kilau eka ayue melai hong sorga, tuntang kilau petak, dehen palus katatahie.

⁷⁰ Ie mintih Dawid reware, tuntang manduan ie bara kawan meto,

⁷¹bara eka ie mahaga indu tabiri, akan manyakatik Israel, ungkupe.

⁷²Dawid mahaga ewen dengan kahias, tuntang mangagalan ewen hapan kataue.