Read Ngaju MASMUR 80 Bible Online

MASMUR 80 - Ngaju bible

MASMUR 80

¹Akan pamimpin koor. Tumon kare lagu Kambang bakung. Masmur kasaksian Asap.

² O sakatik Israel, hining, Ikau je mamimpin turonan Yosep kilau ije kakawan. Ikau je mondok hunjun kerub,[44] keleh babala hong kalawa,

³intu hila baun Epraim, Benyamin tuntang Manase. Parahan kuasan Aim akan ikei, tuntang keleh dumah manyalamat ikei.

⁴O Hatalla, halalian ikei; tampayah ikei dengan kajentan atei Aim, palus ikei kareh salamat.

⁵O TUHAN, Hatalla Je Jaton Tikas Kuasae sampai hamparea Ikau sangit, aloh ungkup Ayum balakudoa?

⁶Ikau manenga akan ikei tangis indu panginan, johon mata hakutoh indu ihop.

⁷Ikau manalua kare bangsa hakaliling hakapaut tahiu lewun ikei kare musoh ikei tatawe awi kasanange.

⁸O Hatalla Je Jaton Tikas Kuasae, Halalian ikei, tampayah ikei hapan asi, mangat ikei salamat.

⁹Ungkup Ayum kilau batang anggor je iindah Awim bara Misir. Kare bangsa beken iharak Awim, palus Ikau mimbul batang te intu lewun ewen.

¹⁰Ikau manatap petak akae; palus ie muhat handalem tuntang hambirang akan hapus lewu.

¹¹Ie manganjungen kare bukit, tuntang dengan kare edae manyangkulep kare batang seder raksasa.

¹²Patinge mansulur sampai Tasik Bentok, kare pucuke sampai akan Sungei Eprat.

¹³O Hatalla mbuhen Ikau manderep karambange, sampai genep biti je mahalau tau mamutik buae?

¹⁴Bawoi parak kayu manyombet jete sampai rusak, tuntang meto intu janah kuman jete.

¹⁵O Hatalla Je Jaton Tikas Kuasae, keleh dumah haluli, keleh nampayah bara sorga, tuntang ite ungkup Aim.

¹⁶Paliwus ungkup je kilau batanganggor jari imbelom Awim kabuat, tuntang salundik anggor je indehen Awim.

¹⁷Musoh jari maneweng tuntang mangehue; nauhe ewen imbinasa awi kasangit Aim.

¹⁸Kalindong oloh je jari iintih Awim, anak olon je impaabas Awim Akam.

¹⁹Te ikei dia tinai mahiwang bara Ikau; jaga pambelom ikei, te ikei kareh manara Aram.

²⁰O TUHAN, Hatalla Je Jaton Tikas Kuasae, halalian ikei, tampayah ikei hapan asi, mangat ikei salamat.