Read Ngaju MASMUR 83 Bible Online

MASMUR 83 - Ngaju bible

MASMUR 83

¹Masmur Asap: ije nyanyi.

²O Hatalla, ela benyem, ela mamangkut Arep tuntang melai manyuni.

³Ite, musoh Aim ridu, kare oloh je basingi Dengam mandarhaka.

⁴Ewen mawi rencana bakalilit malawan ungkup Ayum; tuntang hatahiu malawan kare oloh je ingalindong Awim.

⁵Koan ewen, “Keleh itah mahancor bangsa Israel, uka aran ewen ingalapean.”

⁶Kare bangsa jadi hinje, tuntang mawi pakat malawan Ikau:

⁷bangsa Edom tuntang Ismael, kare oloh Moab tuntang Hagar;

⁸bangsa Gebal, Amon tuntang Amalek, bangsa Pilistin hayak oloh lewu Tirus.

⁹Kea Asur jari omba ewen, jadi pai lengen turonan Lot.

¹⁰ Awi ewen kilau oloh Midian, kilau Sisera tuntang Yabin intu Sungei Kison,

¹¹je jari imbinasa intu Endor, tuntang jadi pupuk akan petak.

¹² Awi kapalan ewen kilau Oreb tuntang Seeb, keleh mampakalah panguasa ain ewen kilau Sebah tuntang Salmuna,

¹³awi ewen jari hakotak, “Keleh itah manguasa petak eka Hatalla melai.”

¹⁴O Hatalla, tawor ewen kilau kawo, kilau tampilai je ihimun riwut.

¹⁵Kilau apui je manyeha parak kayu, nyalan apui je mangehu kare bukit.

¹⁶Goang ewen hapan taloh basaloh balewut Ayum, narewen ewen hapan riwut barat Aim.

¹⁷O TUHAN, nauhe ewen inawah, mangat ewen mangaku kuasan Aim.

¹⁸Nauhe ewen katatahie impahawen tuntang tapak ikeh, nauhe ewen matei bakahawe-hawen.

¹⁹Keleh ewen katawan baya Ikau bewei Je Pangkahai, TUHAN, je manguasa hapus petak.