Read Ngaju MASMUR 84 Bible Online

MASMUR 84 - Ngaju bible

MASMUR 84

¹Akan pamimpin koor. Tumon lagu: Gitit. Masmur jalahan Korah.

²Lalehan kasanang Ekam melai, o Hatalla Je Jaton Tikas Kuasae!

³Ateiku paham tataharu dengan Humam, hambaruangku basasurak akan Hatalla je belom.

⁴Burong ampit mahin mandino huma tuntang burong kalialang dinon sarangan, eka ewen minaanake tokep mesbeh Aim, o TUHAN Je Jaton Tikas Kuasae, Rajangku tuntang Hatallangku.

⁵Sanang toto oloh je melai intu Humam, tuntang manyanyi tara Akam harajur.

⁶Sanang wei oloh je mandino kaabas bara Ikau, tuntang je handak mawi pangguet akan bukit Sion.

⁷Pandehan ewen mananjong mahalau janah Baka, eka te iobah ewen jadi tahasak, ujan je solake mangontepe dengan berkat.

⁸Kaabas ewen sasar mandahang, katika mananjong akan Sion, akan eka Hatallan kare hatalla mamparahan Arep.

⁹Hining lakudoangku, o TUHAN, Hatalla Je Jaton Tikas Kuasae, hining, o Hatallan Yakob.

¹⁰Keleh mamberkat rajan ikei, o Hatalla, kalindong oloh je jari intih Awim.

¹¹Labih bahalap jandau intu Human Ayum bara sakoyan andau intu eka beken. Aku mintih jadi panjaga baontonggang intu Human Hatallangku bara melai intu human oloh papa.

¹²Awi TUHAN, Hatalla pangalindong itah tuntang raja pangkahai, je manenga akan itah sinta tuntang hormat. Ie dia puji manolak en bewei je bahalap akan oloh je pambelome tinduh.

¹³O TUHAN Je Jaton Tikas Kuasae, sanang toto oloh je percaya Dengam.