Read Ngaju MASMUR 86 Bible Online

MASMUR 86 - Ngaju bible

MASMUR 86

¹Lakudoan Dawid. Hining lakudoangku, o TUHAN, tuntang tombah aku, awi aku belom susah tuntang balemo.

²Haga pambelomku awi Ikau sinta aku, paliwus rewar Ayum je percaya Dengam.

³Ikau Hatallangku, pasi aku o TUHAN, awi hapus andau aku balakudoa intu Ikau.

⁴TUHAN, pahanjak atei rewar Aim, awi inintuku ateiku Akam.

⁵Ikau bahalap, o TUHAN, tuntang rajin mampun, oloh balakudoa intu Ikau tetep inyinta Awim dengan sinta ije hai.

⁶Seneh lakudoangku, o TUHAN, hining pantehauku balaku dohop.

⁷Intu katika kajake aku balakudoa intu Ikau awi Ikau tombah auhku.

⁸O TUHAN, jaton TUHAN kilau Ikau, jaton je malalus taloh je ilalus Awim.

⁹ Uras bangsa je inampa Awim kareh dumah, o TUHAN, akan manyembah Ikau tuntang manara kahain Ayum.

¹⁰Awi Ikau menteng tuntang malalus kare taloh heran, baya Ikau wei Hatalla.

¹¹Ajar kahandak Aim akangku, o TUHAN, uka aku manumon dengan baketep; awi aku manumon dengan bulat atei.

¹²Aku manarimakasih Akam salepah ateiku, o TUHAN, Hatallangku; aku manara kahain Ayum katatahie.

¹³Awi Ikau tetep sinta aku hapan sinta ije hai; Ikau jari maliwus hambaruangku bara rumbak kubur.

¹⁴O Hatalla, oloh bajoho harikas manyarang aku, ije garombolan oloh je tulas handak mampatei aku; ewen dia paduli Ikau.

¹⁵Tapi Ikau, o TUHAN, Hatalla je pamasi tuntang panyayang, kasabar kontep asi tuntang baketep.

¹⁶Tangkilik tuntang pasi aku paabas tuntang paliwus aku, awi kilau induku aku kea manempo Ikau.

¹⁷Tenga akangku tanda kahalap Aim, o TUHAN, uka oloh je basingi aku mahamen, amon ewen mite Ikau mandohop tuntang mampong aku.