Read Ngaju MASMUR 88 Bible Online

MASMUR 88 - Ngaju bible

MASMUR 88

¹Nyanyi. Masmur jalahan Korah. Akan pamimpin koor. Manumon lagu: Mahalat, Leanot. Nyanyi auh ajar Heman, oloh Esrahi.

²O TUHAN, hatalla je manyalamat aku, handau aku mantehau Ikau, hamalem aku manaharep Ikau.

³Keleh lakudoangku sampai Ikau, hining auh tehauku.

⁴Aku intakan are kasusah; pampatei jari tokep.

⁵Aku kilau oloh je mohon akan rumbak kubur, oloh je lepah kaabas.[46]

⁶Aku ilihi marak oloh matei, kilau oloh je buah patei, halelek hong kubur, kilau oloh je ingalapean samasinde, oloh je dia indohop tinai Awim.

⁷Ikau mantarik aku akan rumbak je handalem akan rumbak kuburje handalem tuntang kaput.

⁸Kasangit Ayum mahenyek aku paham babehat, aku hancor ihenyek awi kasangit Aim.

⁹Ikau mangejau kare kapatohku bara aku, tuntang Awim aku eka kajilek ewen. Aku ingurong tuntang dia tau balua.

¹⁰Matangku kawus awi kapehe, sining andau aku mantehau Ikau, TUHAN, tuntang balakudoa dengan lenge indepe.

¹¹En Ikau mawi taloh heran akan oloh matei? En ewen misik tuntang manara Ikau?

¹²En sintan Aim imbarita hong kubur; tuntang kaketep Aim intu eka kabinasa?

¹³En aton je mangatawan gawi heran Ayum intu kakaput, atawa kahalap Aim intu lewu eka oloh ingalapean?

¹⁴Tapi aku balaku pandohop Aim o TUHAN sining hanjewu inyampaiku lakudoa Akam.

¹⁵O TUHAN, mbuhen Ikau manolak aku? Mbuhen Ikau mules baun Ayum bara aku?

¹⁶Bara korik aku kapehe tuntang bilak matei, aku heka[47] mananggong hukuman Aim.

¹⁷Kasangit Ayum je hasep mampahancor aku; gawin Ayum je mangapehe mawi aku binasa.

¹⁸Hapus andau kasangit Ayum kilau danum soho mangaliling aku, mangapong aku bara hete-hete.

¹⁹Kare kawalku je heret denangku ingejau Awim bara aku, tisa kakaput mandengan aku.