Read Ngaju MASMUR 89 Bible Online

MASMUR 89 - Ngaju bible

MASMUR 89

¹ Nyanyin auh ajar ain Etan, oloh Esrahi.

²Asin Aim, TUHAN, handak inyanyiku palus katatahie, kaketep Aim kareh imbaritaku girir-manggirir.

³Awi katawangku sintan Aim je katatahie, kaketep Aim dehen sama kilau langit.

⁴Ikau hamauh, “Aku jari mawi janji dengan oloh paintih-Ku; Aku jari sumpah dengan Dawid, rewar-Ku:

⁵ ‘Padadusam indeheng-Ku sampai katatahie, girir-manggirir anak esom kareh mondok intu hete.’ ”

⁶Pumpong hai huang sorga manara kare gawin Aim je heran, tuntang manyanyi kaketep Aim, TUHAN.

⁷Intu langit jaton je kilau Ikau, o TUHAN, jaton taloh belom hong sorga je manyama Ikau.

⁸Ikau ihormat marak kare oloh barasih, ingikeh labih bara uras kare taloh je hakaliling Ikau.

⁹TUHAN, Hatalla Je Jaton Tikas Kuasae, eweh abas sama kilau Ikau? Ikau baketep hong taloh samandiai, o TUHAN.

¹⁰Ikau manguasa tasik je hariak paham, tuntang mampataduh galombange je hai.

¹¹Rahab,[48] naga tasik, imparotek Awim tuntang impatei Awim, dengan lenge je abas Ikau mampakalah kare musoh Aim.

¹²Langit tuntang petak jete Ayum, kalunen tuntang taloh huange tampan Aim.

¹³Ikau je manampa utara tuntang salatan, Bukit gantong Tabor tuntang Hermon basasurak Akam.

¹⁴Lalehan kahai kuasan Aim, tuntang kahain kaabas Aim.

¹⁵Katetek tuntang hukum jete galang karajaan Aim, sinta tuntang kaketep babala hong kare gawin Aim.

¹⁶Salamat bangsa je manyembah Ikau dengan kahanjak, je belom hong kalawa panumah Aim, TUHAN.

¹⁷Hapus andau ewen hanjak rantangtuntang tetep dehen, awi kahalap Aim.

¹⁸Ikau manenga akan ikei kamanang ije hai, awi kahalap Aim ikei manang.

¹⁹Awi Ikau mangalindong ikei oloh paintih Ayum, o TUHAN; rajan ikei iete ayun Hatallan karasih Israel.

²⁰Horan intu ije paite, Ikau hakotak dengan rewar Aim je baketep, “Aku jari mandohop ije biti pahlawan, ije biti oloh je iintih-Ku bara rayat jari inggatang-Ku.

²¹ Aku jari sondau Dawid rewar-Ku, tuntang Aku malantik ie dengan undus upacara.

²²Kaabas-Ku kareh harajur mangalindong ie, kuasang-Ku kareh mampaabas ie.

²³Ie dia kareh impakalah musoh, tuntang dia kareh inindas oloh papa.

²⁴Uras kare musohe kareh imbinasa-Ku, impatei-Ku eweh bewei je basingi dengae.

²⁵Aku kareh tetep sinta ie tuntang baketep dengae. tuntang mawi ie sasar bara kuasa.

²⁶Karajaae kareh impalombah-Ku, bara Tasik Bentok sampai Sungei Eprat.

²⁷Ie kareh hamauh dengang-Ku, ‘Ikau bapaku, Hatallangku, pangalindong tuntang panyalamatku.’

²⁸ Aku kareh manjadian ie jadi anak-Ku je tambakase, je paling pangkahai marak kakare raja!

²⁹Ie kareh tetep inyinta-Ku sampai katatahie, janjing-Ku dengae tetep dehen.

³⁰Padadusae indeheng-Ku katahin aton langit intu hunjun petak, girir-manggirir kareh anak esoe mondok hunjue.

³¹Tapi amon turonae malanggar parentah-Ku, tuntang dia belom manumon kahandak-Ku,

³²amon ewen dia paduli atoh-Ku tuntang malihi tukas-Ku,

³³ewen ihukum-Ku dengan pukul awi kalangkahe, tuntang iawi-Ku dengan calaka tagal kare dosae.

³⁴Tapi Aku kareh tetep sinta Dawid, tuntang dia kareh malanggar katetep-Ku.

³⁵Janjing-Ku dengae dia akan imbalang, tuntang janjing-Ku dia Aku manjijite haluli.

³⁶Baya sinde bewei palus katatahie aku sumpah tagal arang-Ku je barasih; Aku dia kareh mananjaro Dawid.

³⁷Padadusae kareh dehen katahin matanandau aton, girir manggirir anak esoe kareh mondok hunjue.

³⁸Karajae tetep aton kilau bulan, saksi baketep intu kare baunandau.”

³⁹Tapi toh Ikau balait dengan raja, Ikau manganan tuntang manolak paintih Aim.

⁴⁰Ikau mambalang janjin Aim dengan rewar Aim, makotae intarik Awim akan lumpur.

⁴¹Inderep Awim kare dinding kotae, kare dinding batue iawim karam taloh.

⁴²Uras oloh je mahalau manduan panataue, ie jadi akan tatawen kapatohe.

⁴³Ikau manenga kamanang akan kare musohe, tuntang mawi uras musohe hanjak.

⁴⁴Sanjatae mahin Ikau mawie dia baguna, Ikau dia mandohop ie intu parang.

⁴⁵Ikau mampahapus kuasae je hai, padadusae intarik Awim akan petak.

⁴⁶Ikau mamandak wayah katabelae, tuntang manyangkulep ie dengan kahawen.

⁴⁷Sampai hamprea Ikau basahokan, o TUHAN? Sampai hamprea kasangit Aim hagandang kilau apui?

⁴⁸Ingat kapaham kapandak pambelom toh, inampam oloh kilau taloh belom je minjam bewei.

⁴⁹Eweh je tau tarus belom tuntang dia matei? Eweh je tau lapas bara kubur?

⁵⁰O TUHAN, kueh tanda sintan Aim je solake, je injanji Awim dengan Dawid tagal kaketep Aim?

⁵¹Ingat o TUHAN, kilen ampie amon rewar Aim toh inyalan, aku mananggong are tawah bara kare bangsa.

⁵²Kare musoh Aim manawah raja paintih Aim, o TUHAN, manawah ie akan kueh bewei ie haguet.

⁵³Tara TUHAN palus katatahie. Keleh manjadi tumon te! Amen!