Read Ngaju MASMUR 9 Bible Online

MASMUR 9 - Ngaju bible

MASMUR 9

¹Akan pamimpin koor. Manumon lagu Mut-Laben. Masmur Dawid.

²Dengan salepah atei aku handak manarimakasih intu Ikau, TUHAN, tuntang mambarita gawi Aim je hai.

³Aku handak hanjak rantang tagal Ikau tuntang manara Aram, TUHAN Je Pangkahai.

⁴Intu taharep Ayum musohku mules tuntang hadari; ewen manjato tahantok tuntang matei.

⁵Awi Ikau marentah kilau hakim je adil; Ikau jari mambela pakarangku.

⁶Ikau jari mahukum kare bangsa tuntang mambinasa kare oloh papa. Ewen ingalapeam sampai katatahie.

⁷Musoh ikei jari lepah impalomos, kare lewun ewen impahancor Awim, jaton hindai je mingat jete.

⁸TUHAN marentah katatahie; Ie mampendeng padadusan Aie hapa mahakim kalunen.

⁹Ie marentah kare bangsa dengan adil tuntang mahakim ewen dengan bujur buah.

¹⁰TUHAN te eka bakalindong akan oloh je inindas, eka bakalindong hong wayah kajake.

¹¹Oloh je kasene Ikau harap Dengam, o TUHAN, oloh je manyembah Ikau dia ilihim Awim.

¹²Tara TUHAN je marentah hong Sion! Sarita gawin Aie akan kare bangsa!

¹³Awi Ie mingat oloh je susah tuntang dia mangalapean kariak ewen; oloh je mawi kakaras ihukum Awie.

¹⁴Keleh ite, musoh mangapehe aku pasi aku, o TUHAN, keleh maliwus aku bara pampatei,

¹⁵mangat aku manara Ikau intu taharep oloh lewu Yerusalem. Aku kareh basasurak hanjak awi Ikau manyalamat aku.

¹⁶Kare bangsa je dia kasene Ikau manjato akan lowang je ingali ewen kabuat; ewen buah jarat ain ewen kabuat.

¹⁷TUHAN jari mamparahan Arepe awi putusae adil. Oloh papa tambohos awi gawie kabuat.

¹⁸Pampatei jete kajarian kare oloh papa, kare bangsa je dia paduli Hatalla.

¹⁹Dia sampai katatahie oloh je belom susah ingalapean; dia raju-rajur oloh je susah jaton kaharap.

²⁰Harikas, TUHAN, keleh mahakim kare bangsa, ela manalua olon mampasombong arepe.

²¹Nauhe ewen mikeh, o TUHAN, tuntang kasene je ewen baya olon.