Read Ngaju MASMUR 90 Bible Online

MASMUR 90 - Ngaju bible

MASMUR 90

¹Lakudoan Moses, rewar Hatalla. O TUHAN, Ikau eka ikei bakalindong girir manggirir.

²Sahelo bara kare bukit inampa, sahelo bara petak tuntang kalunen inampa Awim Ikau wei Hatalla je katatahie, jaton bara tamparan tuntang bara kahapus.

³Ikau manyoho olon haluli akan asale, jadi tunek petak kilau panyolake.

⁴ Akam sakoyan nyelo kilau ije andau, andau male je jari halau; kilau ije gilir jaga hamalem.

⁵Ikau mampahantong ikei; ikei sama kilau nupi, kilau oru je manyalundik;

⁶hanjewu ie lembut tuntang mangambang, tapi balayu halemei.

⁷Ikei tarewen awi kasangit Aim, tuntang lepah binasa awi kalait Aim.

⁸Ikau mingkes kasalan ikei intu taharep Aim, dosan ikei je basahokan gitan Awim.

⁹Pambelom ikei pandak awi Ikau balait, kare nyelon ikei hapus kilau kewus tahaseng.

¹⁰Kapanjang pambelom ikei baya ujupuluh nyelo, amon ikei abas hanya puluh nyelo. Tapi baya kasusah tuntang kapehe je dinon ikei; limbah pambelom je pandak, ikei lilap.

¹¹Eweh je kasene kapaham kalait Aim, atawa harati kajarian kasangit Aim?

¹²Parendeng ikei tahiu kapandak pambelom toh uka ikei jadi oloh je pintar harati.

¹³O TUHAN sampai hamprea Ikau sangit? Keleh mules tuntang pasi kare rewar Aim.

¹⁴Keleh mambesoh ikei hapan sintan Aim genep hanjewu, mangat ikei hanjak tuntang manyanyi katahin andau umur ikei.

¹⁵Tenga akan ikei kasanang tumon kare kapehe je inanggong ikei hong kare nyelon kapehe.

¹⁶Parahan gawin Aim akan kare rewar Aim, tuntang kuasan Ayum je hai akan turonan ikei.

¹⁷O TUHAN, Hatallan ikei, berkat ikei, mangat kare gawin ikei bahasil.