Read Ngaju MASMUR 92 Bible Online

MASMUR 92 - Ngaju bible

MASMUR 92

¹Nyanyi akan andau Sabat.

²Bahalap toto manarimakasih intu Ikau, o TUHAN, tuntang manara Aram, o Hatalla Je Pangkahai;

³mambrita sintan Aim hong hanjewu, tuntang kaketep Aim hong hamalem,

⁴sambil mampahiau gitar sapuluh tali, impahayak gambus tuntang kacapi.

⁵Awi gawin Aim mampahanjak ateiku, aku manyanyi kahanjak awi gawin Aim.

⁶Lalehan kahain kare gawin Aim, o TUHAN, paham handalem kare tirok Aim!

⁷Oloh humong dia tau kasene, oloh bureng dia tau haratie.

⁸Tau hirahe oloh darhaka lembut bajewong sama kilau oru, tuntang oloh papa sasar tatau tuntang sanang; tapi ewen kareh imbinasa samasinde,

⁹awi Ikau, TUHAN, barakuasa palus katatahie.

¹⁰Ikei katawan kareh musoh Aim impalomos, o TUHAN, uras kare oloh papa kareh pisah-darai.

¹¹Ikau mawi aku abas sama kilau banting bariar, tuntang mamberkat aku hapan kasanang.

¹²Aku mite kakalah kare musohku, kare oloh je jari harikas malawan aku, kare rencana papa ain ewen jari ihiningku.

¹³Oloh tetek manyalundik kilau upon kurma, tuntang mangambang sama kilau camara Libanon.

¹⁴Ewen kilau batang kayu je iimbul intu Human TUHAN, tuntang mangambang intu Human Hatallan itah,

¹⁵upon kayu je magon mamua katika kabakase, tetep bahijau tuntang bajewong.

¹⁶Jete buktie je TUHAN adil; ie pambela aingku, jaton kaculas intu Ie.