Read Ngaju MASMUR 94 Bible Online

MASMUR 94 - Ngaju bible

MASMUR 94

¹O Hatalla, Ikau Hatalla je mambaleh parahan gawin pambaleh Aim, o TUHAN.

²Keleh harikas Mendeng, o hakim hapus hunjun petak, keleh mahukum oloh bajoho tumon gawin ewen.

³O TUHAN, sampai hamparea oloh papa hanjak? Sampai hamparea, o TUHAN?

⁴Ewen mampalua kare auh je kasar, tuntang manara kapapan ewen.

⁵Ewen manindas ungkup Aim, o TUHAN, tuntang mampalomos kare oloh paintih Aim.

⁶Ewen mampatei balo tuntang nole tuntang oloh bangsa luar je melai hong lewu toh.

⁷Koan ewen, “TUHAN dia mitee, Hatallan Yakob dia nantuanie.”

⁸O Bangsa ayungku, ela tumon kahumong jete bajar mahapan akalm!

⁹Hatalla je manampa pinding, en Ie dia mahining? Ie je manampa mate, en Ie dia tau mite?

¹⁰Ie je majar kare bangsa, en Ie dia mahukum? Ie je jadi guru akan oloh samandiai, en Ie jaton pangatawan?

¹¹ TUHAN kasene tirok olon, Ie katawan uras te hayang bewei.

¹²Salamat oloh je iajar Awim, o TUHAN, oloh je iajar Awim tahiu kare hukum Aim.

¹³Ikau manyanang ateie hong kare andau calaka, sampai lowang ingali uka manawan oloh papa.

¹⁴Basa TUHAN kareh dia malihi ungkup Ayue; Ie dia kareh manalua kare taloh handiai je manjadi pusaka Akae.

¹⁵Maka hukum kareh indehen tinai intu pangadilan, uras oloh tetek kareh omba jete.

¹⁶Ewen mambela aku malawan oloh darhaka? Eweh mamihak aku malawan oloh je mawi kapapa?

¹⁷Jaka TUHAN dia mandohop aku, aku bilak bindah akan lewun noloh matei.

¹⁸Katika aku manirok je aku kareh manjato, sintan Aim o TUHAN, mawi aku mandeng segah.

¹⁹Amon ateiku bagalabah tuntang balisah, Ikau mampong tuntang mampahanjak aku.

²⁰Ikau dia hinje dengan kare hakim papa, je marencana kapapa hagalang hukum.

²¹Ewen pakat malawan oloh bujur je ateie, tuntang mahukum matei oloh je dia sala.

²²Tapi TUHAN te pambela akangku, Hatallangku jadi kalindongku.

²³Ie mahukum oloh papa tumon kapapae, tuntang mangop nyaman ewen tagal dosae. TUHAN, Hatallan itah kareh mangop nyaman ewen.