Read Ngaju SEWUT SALOMO 1 Bible Online

SEWUT SALOMO 1 - Ngaju bible

SEWUT SALOMO 1

¹ Jetoh kare auh tanding bara Salomo anak Dawid, raja Israel.

²Tintun auh tanding toh iete uka mandohop oloh mangatawan kilen ampie jadi oloh pintar harati, tuntang katawan atoran belom hayak tau kasene kare auh kotak je handalem rimae.

³Kare auh tanding toh majar kilen ampie oloh tau belom mahapan kapintar tuntang haharati, bujur, adil, belom huang katoto.

⁴Oloh je jaton panyangkume iajare uka mandino tirok je barendeng, oloh tabela iajar jadi pintar tuntang bakas tiroke

⁵Hapan kare auh tanding toh oloh pintar harati sasar mandahang pangatawae, tuntang oloh je jari aton sakolae akan ingagalan.

⁶Awi te ewen tau kasene riman taloh basilim huang auh tanding, tuntang maharati kare kotak oloh pintar harati hayak kare perkara je insanan ewen.

⁷ Mangat mandino auh tanding je toto, sola-solake oloh musti aton pangkeme hormat tuntang mikeh dengan TUHAN. Oloh humong dia marega pangatawan tahiu kapintar kaharati tuntang dia maku iajar.

⁸Keleh manantuani taloh je insanan bapam tuntang indum akam, anakku,

⁹awi kare ajar ewen mandahang kaharatim kilau pambungas takolok tuntang saling akan mampahalap baum.

¹⁰Amon oloh badosa mamakat ikau, anakku, ela omba auh tanding ewen.

¹¹Jaka ewen hamauh, “Ayo itah manggau oloh tuntang mangarobot ie. Akan ure-ureh, ayo itah manyarang oloh je dia aton kasalae.

¹²Toh ewen belom sanang tuntang barigas, tapi kareh ewen jadi oloh je satengah matei.

¹³Itah manduan kare ramon ewen je barega, mangat human itah kontep dengan ramo rampasan.

¹⁴Ayo omba, kareh asil takau te itah mambagie sama rata!”

¹⁵Ela omba kare oloh je kalote, anakku!

¹⁶Ewen dia tau melai suni amon hindai mawi kapapa. Ewen handak jeleng-jeleng mampatei.

¹⁷Burong mahin dia tau tame jaring je imbirang intu hila bau matae,

¹⁸tapi kare oloh papa te manenan jarat akae kabuate haream — jarat je akan mancalaka ewen.

¹⁹Punae, oloh je satiar hapan kakaras akan mambayar dengan hambaruae kabuat.

²⁰ Hining! Pangatawan tahiu kapintar tuntang kaharati mantehau intu kare jalan tuntang mangkariak intu kare alon-alon!

²¹Ie mantehau intu kare lawang tuntang intu kare eka je rami:

²²“O kare oloh badungil! Sampai hamparea keton nahuang tetep tumon te? Hamparea katikae keton terai manawah pangatawan tuntang manolak auh ajar?

²³Hining auhku amon aku maningak keton, palus akan keton insanangku kahandakku tuntang iajarku auhku.

²⁴Keton jari intehauku tapi keton mangabele tuntang dia padulie.

²⁵Uras kare auh ajarku inalua keton tuntang kare tingakku inolak keton.

²⁶Awi te, amon keton calaka, aku akan manantawe keton. Amon keton mikeh, aku akan mambaka keton.

²⁷Yoh, aku akan mambaka keton amon keton meles tuntang kapehe awi buah calaka je dumah kilau taloh je basaloh balewut.

²⁸Metoh te keton akan mantehau aku, tapi aku dia akan tombah. Keton akan manggau aku akan hete-hete tapi dia sondau aku.

²⁹Keton kilau oloh je dia puji rajin mandino pangatawan, tuntang bakulas manumon parentah TUHAN.

³⁰Keton dia puji maku manarima kare auh ajarku atawa manantuani kare tingakku.

³¹Awi te, keton akan mangkeme kajarian kare gawin keton tuntang kare rancana keton je papa.

³²Oloh je jaton pangalamae akan matei awi manalua aku, tuntang oloh humong akan hancor awi dia paduli auhku.

³³Tapi oloh je mahining auhku akan ihaga. Ie belom mangat tuntang dia perlu mikeh.”