Read Ngaju SEWUT SALOMO 10 Bible Online

SEWUT SALOMO 10 - Ngaju bible

SEWUT SALOMO 10

¹Jetoh kare auh tanding Salomo: Anak je pintar harati mampahanjak bapae; anak je humong mangapehe atei indue.

²Panatau je dinon dia dengan kabujur dia mimbit kaontong; tapi, kabujur akan manyalamat.

³TUHAN dia manalua oloh bahalap balau; tapi Ie mahambang oloh papa uka oloh te ie dia dinon taloh je ingahandake.

⁴Oloh kadian akan belom susah; oloh je rajin akan manjadi tatau.

⁵Oloh pintar harati mangumpul hasil geteme hong puna wayahe, tapi oloh je batiroh bewei hong wayah getem mahamen dengan arepe kabuat.

⁶Oloh bahalap akan mandino berkat. Katulas basahokan hong kare auh oloh papa.

⁷Kakenang dengan oloh bahalap iete berkat, tapi oloh papa bajeleng ingalapean.

⁸Oloh je pintar rajin manarima nasehat; oloh je pandere humong akan layang.

⁹Oloh bujur, pambelome aman; oloh je manipu akan ingatawan.

¹⁰Eweh je manyahokan katoto, mampalembut kasusah; eweh je mangaritik tara-tarang, mawi kasanang.[6]

¹¹Kotak pander oloh bahalap mawi pambelom sanang, tapi intu kare kotak oloh papabasahokan atei je eka kajilek.

¹² Kasingi mampalembut kapaut kabantah; sinta asi mampun uras kare kasalan.

¹³Oloh je tiroke handalem mangotak auh kapintar kaharati; oloh humong patut injara.

¹⁴Oloh pintar harati manampunan pangatawan; amon oloh humong hakotak, ie manggau calaka.

¹⁵Panatau mangalindong oloh tatau, kasusah mambinasa oloh je belom susah.

¹⁶Amon oloh mawi kahalap, upahe belom sanang; amon mawi dosa, kajariae labih are dosa.

¹⁷Eweh paraba tingak akan belom sanang mangat, eweh bakulas mangaku kasalae, aton huang bahaya.

¹⁸Oloh je manyahokan kasingi iete panipu. Oloh je manyarita auh mamapa oloh beken, ie bureng.

¹⁹Sasar are bapander sasar are jalae tau mawi dosa; oloh je tau mangamburi jelae iete oloh je pintar harati.

²⁰Kotak oloh bahalap iete kilau perak toto; tirok oloh papa jaton bara rima.

²¹Auh oloh bahalap jadi berkat akan oloh are; kahumong oloh humong mampatei arepe kabuat.

²²Awi berkat TUHAN bewei oloh jadi tatau; bagawi bahimat dia tau mandahang panatau.

²³Oloh humong rajin mawi kasalan; oloh pintar harati rajin manggau pangatawan tahiu kapintar tuntang kaharati.

²⁴Oloh je bahalap ateie mandino taloh je eka kanahuange; oloh papa mandino taloh je paling ingikehe.

²⁵Amon riwut barat manampur, maka oloh papa lilap; tapi oloh bujur tetep dehen katatahie.

²⁶Ela manyoho oloh kadian, ie baya mawi oloh manyengkel, kilau cuka mawi kasinge manyilo atawa asep mawi mate hakarah.

²⁷Hormat TUHAN, te ikau akan belom tahi; oloh papa matei helo bara katikae.

²⁸Kaharap oloh bahalap mawi ie sanang; kaharap oloh papa ngahus samasinde.

²⁹TUHAN mangalindong oloh bujur ateie, tapi mambinasa oloh je mawi kapapa.

³⁰Oloh bujur akan belom sanang mangat; oloh papa dia akan melai intu petak pusaka.

³¹Oloh bujur mangotak auh kapintar kaharati; oloh papa akan inyumbel nyamae.

³²Kare auh oloh je bahalap ateie manyanang atei; kare auh oloh papa harajur mangapehe.