Read Ngaju SEWUT SALOMO 11 Bible Online

SEWUT SALOMO 11 - Ngaju bible

SEWUT SALOMO 11

¹TUHAN basingi dengan oloh je mahapan timbangan je dia bujur tapi ie sanang dengan oloh je mahapan timbangan je buah.

²Oloh je bajoho akan inawah; oloh je randah atei ie te pintar harati.

³Oloh bahalap ingagalan awi kabujur ateie; oloh je rajin mananjaro imbinasa awi tanjaroe.

⁴Amon manaharep pampatei, panatau jaton aton rimae; pambelom ayum akan salamat amon ikau bujur ateim.

⁵Jalan pambelom oloh bahalap imparata awi kabujur atei, tapi oloh papa manintu kabinasa.

⁶Oloh bujur salamat awi kahalap ateie; oloh je dia tau imercaya tambohos awi kabungoe.

⁷Amon oloh papa matei, kaharape matei kea; harap dengan kaabas kabuat jaton rimae.

⁸Oloh barasih lapas bara kajake; oloh papa pambelome ingampeng.

⁹Pander oloh papa mambinasa; pengatawan tahiu kapintar kaharatin oloh bahalap manyalamat.

¹⁰Lewu rami amon oloh bujur ateie dinon rajaki; rayat basasurak amon oloh papa matei.

¹¹Berkat oloh bujur mampahalap lewu; auh oloh papa marusak jete.

¹²Manawah oloh beken jete gawin kabureng; oloh je bahalap budi basarae dia akan mamader taloh en-en.

¹³Oloh je manyarita kabar ngahus dia tau mimbing rahasia, tapi oloh je tau imercaya tau marahasia perkara.

¹⁴Bangsa akan hancor amon jaton kapala; sasar are oloh je mampingat sasar are jaminan dinon salamat.

¹⁵Hanjanji bayar utang oloh beken rimae mampadumah calaka. Labih bahalap dia omba huang perkara te mangat dia buah kasusah.

¹⁶Oloh bawi je harati mandino hormat; oloh je tulas mamumpong panatau.

¹⁷Oloh je bahalap ateie mimbit ontong akan arepe; oloh je tulas mamparugi arepe.

¹⁸Kaontong oloh papa iete kaontong je iha-ihat bewei, kaontong oloh je mawi kahalap iete kaontong je toto.

¹⁹Eweh je rajin mawi kahalap, akan belom sanang mangat; eweh jua-juan mawi kapapa manintu pampatei.

²⁰TUHAN basingi dengan oloh je papa ateie, tapi Ie sinta oloh je belom tinduh.

²¹Oloh papa batantu buah hukum; oloh bahalap akan salamat.

²²Kahalap oloh bawi je dia impahayak kahalap hadate, sama kilau tisin amas intu urong bawoi.

²³Kanahuang oloh bahalap harajur mahasil taloh je bahalap; tapi je tau iharap awi oloh papa baya kasangit.

²⁴Aton oloh je rajin manenga tapi sasar tatau, aton kea oloh je bukih, tapi sasar belom susah.

²⁵Oloh je are manenga akan hakutoh kare panataue, oloh je rajin mandohop akan indohop kea.

²⁶Eweh manawon akan inyapa oloh, tapi oloh je manjuale akan mandino tara.

²⁷Eweh rajin mawi kahalap akan ingilak oloh; eweh manggau kapapa, akan buah kasusah.

²⁸Eweh manamam ramoe akan manjato sama kilau dawen batue; oloh barasih akan mangambang kilau salundik mangor.

²⁹Oloh je manyusah keluargae, akan nihau taloh samandiai. Oloh humong akan mandohop oloh je tempon pangatawan tahiu kapintar tuntang kaharati.

³⁰Oloh bahalap akan injamin pambelome; oloh pintar harati mandahang oloh ayue.

³¹ Amon hong kalunen toh oloh bahalap mahin mandino baleh, batantu oloh papa tuntang badosa akan mandino hukum.