Read Ngaju SEWUT SALOMO 13 Bible Online

SEWUT SALOMO 13 - Ngaju bible

SEWUT SALOMO 13

¹Anak je harati manyeneh toto-toto amon bapae manenga auh ajar; oloh bajoho dia maku manarima tingak.

²Kotak oloh bahalap mampadumah kaontong; oloh je dia bujur rajin dengan kakaras.

³Oloh je manjaga kotak tuture akan dia buah kapehe hong pambelome; oloh je hakotak baranga-rangai akan buah calaka.

⁴Oloh kadian are kanahuange, tapi jaton ije je olih ie dinoe; oloh je karas bagawi mandino taloh je eka kanahuange.

⁵Oloh bujur ateie basingi dengan tanjaro, gawin oloh papa mampahawen tuntang mamapa.

⁶Kabujur atei mahaga oloh je belom bujur; kapapa mambinasa oloh je badosa.

⁷Aton je pura-pura tatau, padahal jaton ramoe; aton je pura-pura belom susah, tapi tatau toto.

⁸Oloh tatau musti mampalua duit mangat pambelome aman; oloh je belom susah empas bara ancaman.

⁹Oloh barasih kilau kalawa hai; oloh papa kilau sumbo belep.

¹⁰Kajoho baya mampalembut kapaut kabantah; oloh je pintar harati hakon manarima ajar.

¹¹Panatau je murah dinon akan bajeleng bakurang kea; tapi panatau je imumpong misut-misut akan sasar mandahang.

¹²Amon kahandak dia iilalus, mawi atei kapehe; amon kanahuang dinon atei sanang.

¹³Oloh je manawah ajar TUHAN mancalaka arepe; oloh je manumon parentah Hatalla akan dinon upahe.

¹⁴Auh ajar oloh pintar harati kilau upon kasanang; amon aton ancaman, auh ajar te manyalamat.

¹⁵Oloh harati akan inara; oloh je dia olih imercaya akan belom susah.

¹⁶Oloh pintar harati manirok bua-buah helo bara malalus gawie; oloh humong mamparahan kahumonge.

¹⁷Sarohan je jaton kaharatie mampadumah calaka sarohan je tau imercaya manenga hasil.

¹⁸Oloh je dia maku iajar jadi belom susah tuntang randah; oloh je paduli dengan nasehat akan ihormat.

¹⁹Paham bahalap dinon taloh je eka kahandak! Oloh humong dia maku mules bara kapapa.

²⁰Oloh je belom dengan oloh pintar harati akan jadi pintar harati; oloh je belom dengan oloh humong, akan calaka.

²¹Oloh badosa harajur inggoang calaka oloh bahalap harajur manarima kasanang.

²²Oloh bahalap mawaris panatau akan anak esoe; panatau oloh badosa ingkes akan oloh je belom bujur.

²³Petak buang tau manenga hasil kare panginan akan oloh je belom susah; tapi taloh je dia adil mawi petak te dia inggawi.

²⁴Dia mamukul anak, rimae dia sinta dengae; amon sinta, musti bahanyi mamukul ie.

²⁵Oloh je bahalap harajur dinon kasukup, tapi oloh papa harajur tapas.