Read Ngaju SEWUT SALOMO 14 Bible Online

SEWUT SALOMO 14 - Ngaju bible

SEWUT SALOMO 14

¹Huma serok imangun awi kapintar kaharatin oloh bawi, tapi induroh awi kahumonge.

²Oloh bujur mikeh tuntang hormat dengan TUHAN, Hatalla; oloh je pambelome dia bujur manawah Ie.

³Awi kajoho oloh humong rajin manara arepe, oloh pintar harati akan ingalindong awi kotake kabuat.

⁴Amon jaton sapi, hasil intu tana jaton; hapan kaabas sapi, taloh je inggetem akan are.

⁵Saksi je bujur ateie harajur mansanan katoto, saksi je dia tau imercaya harajur mananjaro.

⁶Oloh bajoho dia akan manjadi pintar harati, tapi oloh pintar murah bajar.

⁷Ela mangawal oloh bureng; jaton ije je tau iajare akam.

⁸Oloh pintar harati katawan kilen ampie patut bagawi, oloh humong buah tipu awi kahumonge.

⁹Oloh humong dia paduli en dosae iampun atawa dia; oloh bahalap nahuang iampun dosae.

¹⁰Hanjak atawa susah aton intu atei; oloh beken dia olih omba mangkemee.

¹¹Human oloh bahalap tetep dehen; human oloh papa akan baduroh.

¹² Aton jalan je ampie bujur tapi lawin jalan te manintu pampatei.

¹³Hong silan auh tatawe tau aton tangis; kahanjak tau impahapus awi kapehen atei.

¹⁴Oloh papa akan mamutik bua kapapae; oloh bahalap akan mamutik bua kahalape.

¹⁵Oloh humong percaya dengan genep bawak kotak, oloh pintar harati bagawi bua-buah.

¹⁶Oloh je bahalap budi basarae harajur bagawi barendeng tuntang mangejau kapapa; oloh humong sangit, palus mangkeme angate sanang.

¹⁷Oloh je rajin rahas, malalus gawin kahumong; oloh je pintar harati langkasae sabar.

¹⁸Oloh je jaton pangalamae akan manjadi humong; oloh pintar harati akan mandahang pangatawae.

¹⁹Oloh papa akan mamenda oloh je bujur ateie; uka balaku mangat inenga asi.

²⁰Oloh je belom susah dia ingilak aloh awi kawale, tapi oloh tatau are sobate.

²¹Eweh manawah oloh beken, ie mawi dosa; eweh bahalap dengan oloh je belom susah, akan mandino kasanang.

²²Eweh je manggau kahalap akan imercaya tuntang mandino hormat; eweh mangarangka taloh je papa aton intu jalan je layang.

²³Huang gagenep satiar aton kaontonge; pander ngahus mawi oloh jadi belom susah.

²⁴Oloh pintar harati inara awi kapintar kaharatie; oloh humong basewut awi kahumonge.

²⁵Amon ije biti saksi hamauh huang katoto ie manyalamat hambaruan; amon ie mananjaro, ie darhaka dengan sama arepe.

²⁶Oloh je manempo TUHAN jadi sanang mangat, tuntang keluargae mandino eka bakalindong.

²⁷Manempo TUHAN jete upon kare kasanang; tuntang jalan akan mahakan pampatei.

²⁸Katamam raja aton intu jumlah kare rayate; amon jaton rayat ie dia aton kuasae.

²⁹Oloh pintar harati dia bajeleng sangit; oloh humong dia olih manahan arepe.

³⁰Atei je tanggar mamparigas biti; kahirin atei sama kilau panyakit je mampatei.

³¹Eweh mawi kahalap dengan oloh je belom susah, ie mahormat Hatallae; eweh mahenyek oloh balemo ie manawah je manjapae.

³²Oloh papa binasa awi kapapa; oloh bahalap iawat awi kabujur ateie.

³³Pangatawan tahiu kapintar tuntang kaharati; harajur aton intu tirok oloh je bahalap budi basarae, tapi ihenyek intu tirok oloh humong.

³⁴Kaadilan tuntang kahalap manggatang hormat bangsa, tapi dosa mawi bangsa jadi hina.

³⁵Raja mangilak pagawai je apik; tapi ie balait dengan pagawai je dia tau malalus gawie.