Read Ngaju SEWUT SALOMO 15 Bible Online

SEWUT SALOMO 15 - Ngaju bible

SEWUT SALOMO 15

¹Hapan auh tombah je bajenta kasangit nihau; auh tombah je karas mawi kasangit.

²Kare auh oloh pintar harati mawi pangatawae mampipen oloh; kare auh oloh humong baya basuang kahumong.

³TUHAN mite taloh handiai je manjadi hong kare eka; ie manantuani urase je bahalap dengan je papa.

⁴Kare auh je bahalap mandahang karajin atei; kare auh je mangapehe mampalemo kahandak.

⁵Oloh humong manawah auh ajar bapae; oloh pintar harati manarima auh tingak.

⁶Intu human oloh bahalap are panatau; panatau oloh papa lilap awi calaka.

⁷Kare auh oloh pintar harati kontep dengan pangatawan, tapi tirok oloh humong dia kalote.

⁸TUHAN manarima lakudoan oloh bahalap, tapi Ie basingi dengan parapah oloh papa.

⁹TUHAN basingi dengan cara belom ain oloh darhaka, tapi Ie sinta oloh je malalus kahandak Ayue.

¹⁰Oloh je malalus taloh papa akan inyiksa; oloh je dia maku impuji akan matei.

¹¹TUHAN katawan eka oloh matei tuntang huange; kueh tau tirok olon inyahokan bara Ie?

¹²Oloh je rajin manawah dia rajin impuji; ie bakulas balaku nasehat bara oloh pintar harati.

¹³Atei je hanjak mawi ampin bau mate bahalap tampayahe; atei je kapehe mampanihau kahanjak atei.

¹⁴Oloh pintar harati manggau pengatawan; oloh humong deroh dengan kahumonge.

¹⁵Oloh pehe atei harajur manggau jalan hong pambelome, tapi oloh je hanja-hanjak harajur sanang.

¹⁶Labih bahalap isut ramon panatau tapi impahayak kikeh dengan TUHAN, bara are ramon panatau tapi impahayak angat kameles.

¹⁷Labih bahalap kuman sayur tapi impahayak sinta, bara kuman isin meto je mangat tapi impahayak kasingi.

¹⁸Oloh je murah sangit mawi kalahi, oloh je sabar manganan kapaut kabantah.

¹⁹Oloh kadian akan harajur mangkeme kahalin taloh; oloh bujur dia buah kajake.

²⁰Anak je pintar harati manyanang atei bapae; anak je humong dia marega indue.

²¹Kahumong iete kasanang akan oloh badungil, oloh pintar harati belom bujur.

²²Rencana gagal, amon dia inirok bua-buah; rencana aton hasile, amon are je manenga nasehat.

²³Kare auh je ingotak buah katikae, mampalembut kahanjak.

²⁴Oloh pintar harati mahoroi jalan je mandai manintu pambelom; dia ie jalan je mohon manintu pampatei.

²⁵TUHAN akan manderep human oloh bajoho, tapi petak ayun ije biti balo ingalindonge.

²⁶TUHAN basingi dengan rencana je papa; tapi kare kotak je bahalap manyanang ateie.

²⁷Eweh je manggau kaontong je dia bujur, mambinasa keluargae kabuat. Eweh manyingi dengan duit sogok akan belom sanang.

²⁸Oloh bahalap manirok bua-buah kare auhe; oloh papa mansanan kare taloh je eka kajilek.

²⁹TUHAN mahining auh oloh bujur balakudoa, tapi Ie dia paduli lakudoan oloh darhaka.

³⁰Ampin bau je hanjak manyanang atei, barita je bahalap manyalawah hambaruan.

³¹Oloh je paduli auh tingak tame baris oloh je pintar harati.

³²Oloh je dia maku inasehat, dia marega arepe kabuat; oloh je maku manarima tingak, jadi oloh je bahalap budi basarae.

³³Mikeh dengan TUHAN jete tamparan gawin ajar je bahalap, hormat inanselo awi karandah atei.