Read Ngaju SEWUT SALOMO 16 Bible Online

SEWUT SALOMO 16 - Ngaju bible

SEWUT SALOMO 16

¹Olon tau mawi rencana, tapi Hatalla manenga auh tukas Aie.

²Genep gawin oloh olih jadi bahalap tumon tiroke kabuat, tapi TUHAN je manimbang kahandak ateie.

³Sarah akan TUHAN uras rencana aim, palus ikau akan mandino hasil awim malaluse.

⁴Taloh samandiai je ilalus awi TUHAN aton tujuae; tuntang tujuan akan oloh papa iete kabinasa.

⁵Uras oloh bajoho inyingi TUHAN; Ie dia manalua ewen liwus bara hukum.

⁶Oloh je eter ateie dengan Hatalla akan mandino ampun; oloh je manumon akan liwus bara kapapa.

⁷Amon ikau manyanang atei TUHAN, kare musohm iawie jadi sobatm.

⁸Labih bahalap dinon pangolih isut hapan kabujur, bara pangolih are mahapan taloh je dia adil.

⁹Olon tau mawi rencana, tapi Hatalla je manukas jalan pambelome.

¹⁰Raja manarima kuasa bara Hatalla, jadi, Ie dia sala huang mawi tukase.

¹¹TUHAN nahuang oloh malalus kabujur huang badagang, tuntang kea huang mahapan takar tuntang timbangan.

¹²Akan oloh je inenga kuasa, malalus taloh je papa jete taloh je eka kajileke, awi ie marentah dehen awi kaadilan.

¹³Kare auh je toto manyanang oloh je mimbing kuasa, ie sinta oloh je hakotak tumon katotoe.

¹⁴Kasangit raja kilau barita hukum matei; oloh je pintar harati palus mampaterai jete!

¹⁵Kahalap atei raja mawi pambelom sanang, sama kilau baunandau mampamohon ujan intu wayah pandang.

¹⁶Mandino pangatawan tahiu kapintar tuntang kaharati; kejau labih bahalap bara mandino amas; mandino pengatawan labih barega bara mandino perak.

¹⁷Oloh bujur mangejau taloh je papa; oloh je manantuani carae belom, mahaga arepe.

¹⁸Kajoho mawi karusak; manara arep mawi kabinasa.

¹⁹Labih bahalap randah atei tuntang dia bararamo, bara omba oloh bajoho tuntang mangkeme ramo rampasan ewen.

²⁰Nantuani taloh je iajar akam, maka ikau akan mandino taloh bahalap. Percaya dengan TUHAN maka ikau akan sanang.

²¹Oloh pintar harati ingasene bara tiroke je handalem; cara bapander je bahalap, mawi kare kotake sasar imercaya.

²²Kapintar kaharati jete upon kasanang belom akan oloh je bahalap budi basarae; oloh humong ingapehe awi kahumonge kabuat.

²³Tirok oloh je bahalap budi basarae mawi kare auhe pintar harati, tuntang ajar ayue sasar imercaya.

²⁴Auh kajenta sama kilau mado; manis angate tuntang mamparigas biti.

²⁵ Aton jalan je ampie bujur, tapi kajariae jalan te manintu pampatei.

²⁶Awi mipen handak kuman mamaksa oloh manggau usaha; awi kanaie ie tarapaksa bagawi.

²⁷Oloh papa manggau jalan mancalaka sama arepe, kare auhe papa sama kilau apui je habarah.

²⁸Oloh je malalus gawi dia bujur mampalembut kapaut kabantah, mawi dawa je dia toto mamisah sobat je eka kaheret.

²⁹Oloh je tulas manipu sobate, tuntang mimbit ewen huang bahaya.

³⁰Keleh barendeng dengan oloh je tatawe tuntang mambirep matae, ie metoh mangarangka kapapa huang ateie.

³¹Oloh bujur akan inenga umur panjang; uwae kilau makota je bungas.

³²Dia murah sangit labih bahalap bara mingkes kuasa; manguasa arep labih bahalap bara manguasa lewu.

³³Akan mangatawan kajarian belom, olon batenong, tapi je manukas panombahe baya TUHAN kabuat.