Read Ngaju SEWUT SALOMO 17 Bible Online

SEWUT SALOMO 17 - Ngaju bible

SEWUT SALOMO 17

¹Labih bahalap ije kasuap bari impahayak pangkeme je sanang landang, bara panginan je are tuntang manga-mangat tapi impahayak kapaut kabantah.

²Rewar je are pangatawae akan marentah anak je mampahawen; tuntang akan manarima waris hayak dengan kare paharin anak te.

³Amas tuntang perak iuji intu dapur apui, tapi atei oloh iuji awi TUHAN.

⁴Oloh papa manumon kare nasehat je papa; oloh pananjaro rajin mahining kare auh je mamapa oloh.

⁵Eweh manawah oloh belom susah, manawah Hatalla je manjapae. Eweh hanjak tagal kasusah oloh, akan mandino hukum.

⁶Katamam angat oloh je jari bakas iete anak esoe; katamam angat kare anak iete oloh bakase.

⁷Oloh basewut dia patut mampalua kare auh tanjaro; oloh humong dia patut mampalua kare auh barega.

⁸Aton je manyangka duit suap tau mawi taloh heran; hapan duit suap taloh samandiai tau ilalus.

⁹Amon handak ingilak oloh, ampun kare kasalan je iawi ewen. Mungkar kasalan baya manganan karampi dengan kare sobat.

¹⁰Ije tingak labih barega akan oloh je bahalap budi basarae bara saratus hewes akan oloh humong.

¹¹Oloh papa harajur mawi karidu, tapi pampatei manalih ie kilau sarohan je jaton asie.

¹²Labih bahalap hasondau dengan indu bahuang je nihau anake, bara dengan oloh humong je deroh dengan kahumonge.

¹³Eweh mambaleh kahalap dengan kapapa, kapapa kea dia tau impalua bara humae.

¹⁴Nampara kapaut kabantah jete sama kilau muap jalan danum; awi te keleh undur sahelo bara kapaut kabantah nampara.

¹⁵TUHAN basingi dengan oloh je mambujur oloh darhaka; tuntang manyalan oloh je dia sala.

¹⁶Ngahus oloh humong mampalepah duit manggau pangatawan tahiu kapintar tuntang kaharati, awi ie jaton tiroke je bahalap.

¹⁷Ije biti sobat harajur baketep dengan kawale, tapi ije biti pahari omba mananggong kasusah.

¹⁸Oloh je hajanji akan mananggong utang sama arepe iete oloh je humong.

¹⁹Oloh je rajin dengan dosa rajin hakaridu. Oloh je hai auh nyamae, manggau kabinasa.

²⁰Ije biti oloh je gawie manipu dia akan sanang, oloh je pandere ubah alih akan dinon calaka.

²¹Mandino anak je bureng rimae mandino kapehen atei; jadi bapa anak je humong, dia manenga kahanjak.

²²Atei je hanjak mamparigas bereng; atei je susah manambalang kahias atei.

²³Hakim je dia adil manarima duit suap dengan basilim, tuntang dia malalus kaadilan.

²⁴Tintun oloh je harati iete mandino pangatawan tahiu kapintar tuntang kaharati; tapi tintun oloh humong dia batantu.

²⁵Anak je humong manyusah bapae, tuntang mangapehe atei indue.

²⁶Dia patut mampadanda oloh je dia sala; dia patut mahenyek mangapehe oloh je bahalap budi basarae.

²⁷Oloh je handalem tiroke dia are pandere. Oloh je pintar harati harajur taduh sanai.

²⁸Oloh humong mahin inyangka pintar amon ie benyem jaton bapander.