Read Ngaju SEWUT SALOMO 18 Bible Online

SEWUT SALOMO 18 - Ngaju bible

SEWUT SALOMO 18

¹Oloh je mamisah arepe bara oloh beken rimae baya manirok arepe kabuat bewei; genep tirok oloh beken inyoale.

²Oloh humong dia rajin inenga kaharati; ie baya nahuang mampalua pangkeme ayue.

³Dosa tuntang katawah miar haya-hayak; amon jadi inyalan, batantu kea impahawen.

⁴Auh oloh tau jadi upon kapintar kaharati handalem kilau tasik, mangat kilau danum mahasor.

⁵Dia bahalap tiling akan oloh darhaka tuntang mahenyek oloh je dia sala.

⁶Amon oloh humong hakotak ie mawi karidu tuntang balaku jara.

⁷Kotak oloh humong mambinasa arepe; ie buah jarat awi kare auhe.

⁸Auh mamapa te mangat angate; oloh rajin manelee.

⁹Oloh je laya nguan gawie sama kapapae dengan oloh je rajin marusak.

¹⁰TUHAN kilau candi je segah; akan hete oloh bujur haguet tuntang sondau eka je jaton karidu kalahi.

¹¹Tapi oloh tatau manyangka baya ramoe bewei je mangalindong ie kilau dinding gantong je dehen hakaliling lewu.

¹²Oloh je bajoho akan manjato, oloh je randah atei akan ihormat.

¹³Tombah helo bara mahining auh, jete gawi je humong tuntang dia patut.

¹⁴Awi kanahuang belom, oloh olih mananggong kapehe; nihau kanahuang te, nihau kea hapus kaharap.

¹⁵Oloh je bahalap budi basarae harajur haus dengan pangatawan; oloh pintar harati harajur nahuang mandino ajar.

¹⁶Panenga muap jalan tuntang magah oloh akan kare oloh hai.

¹⁷Oloh je solake hakotak hong eka basara harajur bujur ampie, tapi auhe nampara iuji amon dumah je malawan ie.

¹⁸Hapan tenong kare kabantah tau impaterai, kabantah marak kare oloh je kuasa mahin tau impatende.

¹⁹Pahari je jari ingapehe ateie labih bahali inokep bara lewu je dehen; karidu kalahi tanding huit lawang lewu badinding batu.

²⁰Akan kare auh je inyewut aton baleh je akan ingkeme.

²¹Jela tempon kuasa akan manyalamat pambelom atawa marusake; oloh musti mananggong baleh auh nyamae.

²²Oloh je mandino sawae mandino kaontong; sawae jete panenga bara TUHAN.

²³Oloh je belom susah balaku hapan kahalap hadate; oloh tatau tombah hapan garacak.

²⁴Aton sobat je dia baketep, aton kea sobat je labih heret bara pahari.