Read Ngaju SEWUT SALOMO 2 Bible Online

SEWUT SALOMO 2 - Ngaju bible

SEWUT SALOMO 2

¹Keleh narima kare ajarku, anakku, tuntang ingat harajur dengan kare auh ajarku akam.

²Keleh nantuani narai je inyewut pintar harati tuntang keleh maharatie.

³Yoh, anakku, gau mangat mandino tirok je barendeng tuntang laku kaharati.

⁴Gau jete kilau manggau amas, tuntang goang jete kilau manggoang panatau je basilim.

⁵Tumon te ikau akan katawan narai rimae mikeh dengan TUHAN. Ikau akan mandino pangatawan tahiu Hatalla.

⁶TUHAN bewei je manenga pangatawan tahiu kapintar kaharati; bara Ie olon mandino pangatawan tuntang kaharati.

⁷Akan oloh je bujur tuntang tinduh, inenga pandohop tuntang kalindong.

⁸TUHAN mahaga kare oloh je adil, tuntang mangalindong oloh je sinta Ie.

⁹Amon ikau manumon auhku anakku, ikau katawan taloh je adil, bujur, tuntang bahalap. Ikau katawan kea kilen ampin cara ikau patut belom.

¹⁰Ikau akan jadi pintar harati, tuntang pangatawam akan manyanang ateim.

¹¹Kaharati tuntang kapintar akan mangalindong ikau,

¹²hayak mangahana ikau omba cara belom je dia bahalap, tuntang kea mangejau arepm bara kare oloh je papa auh totoke.

¹³Ewen dia maku omba cara belom je bahalap; ewen manduan jalan je kaput tuntang kontep dosa.

¹⁴Ewen mandino kasanang bara gawin ewen je papa.

¹⁵Ewen dia bujur tuntang cara ewen belom mahiwang.

¹⁶Ikau, anakku, akan tau mahakan oloh bawi nakal je manggau jalan mamakat ikau hapan kare auh je manis.

¹⁷Oloh bawi te dia baketep dengan banae tuntang jadi mangalapean janjie dengan Hatalla.

¹⁸Amon ikau akan humae rimae ikau manintu pampatei. Haguet akan hete sama kilau haguet akan lewun kare oloh matei.

¹⁹Oloh je manalih ie dia puji aton je haluli akan jalan manintu pambelom.

²⁰Awi te, anakku, numon sonto ain oloh bahalap, tuntang belom manumon kahandak Hatalla.

²¹Awi, oloh je belom manumon kahandak Hatalla, iete oloh bujur, ewen bewei je melai intu lewu je injanji awi TUHAN.

²²Tapi oloh papa tuntang badosa akan intarik balua awi Hatalla bara lewu te, kilau oru injawut bara petak.