Read Ngaju SEWUT SALOMO 20 Bible Online

SEWUT SALOMO 20 - Ngaju bible

SEWUT SALOMO 20

¹Taloh ihop bahari mawi oloh kurang ajar tuntang ridu. Puna humong oloh je mihop sampai babusau.

²Kasangit raja kilau auh sakungkong singa, oloh je mawi kasangit rimae mancalaka arepe.

³Baya oloh humong ih je rajin hakaridu; hadat je inara iete mangejau karidu kalahi.

⁴Oloh pamalan je kadian dia nguan tanae hong katikae; kajariae hong wayah getem petakedia manenga hasil taloh en-en.

⁵Tirok atei oloh kilau danum huang kalin danum je handalem; tapi tau iasip awi oloh je aton kaharatie.

⁶Are oloh mangaku arepe sobat, tapi je toto-toto eter bahali inyondau.

⁷Kare anak bontong amon tempon bapa je bahalap tuntang belom bujur.

⁸Amon raja mondok hong karosi pangadilan, ie tau nampayah uras taloh je papa.

⁹En aton oloh je tau hamauh, “Ateiku barasih, aku jadi empas bara dosa?”

¹⁰Timbangan tuntang takar je dia bujur dia ingilak TUHAN.

¹¹Bara gawin anak tau ingatawan en langkasae bahalap tuntang bujur.

¹²Pinding hapa mahining tuntang mate hapa manampayah; kadadue te TUHAN bewei je manjapae.

¹³Oloh je rajin batiroh akan belom susah. Oloh je rajin bagawi tempon are panginan.

¹⁴Oloh je mamili harajur bakotok tahiu kalarang rega. Tapi limbah mamili, ie tara-tara dengan rega je dinoe.

¹⁵Kare auh je basuang pangatawan, labih barega bara amas tuntang intan.

¹⁶Eweh maku mananggong utang oloh beken, patut induan ramoe kilau sanda akan janjie.

¹⁷Ramo hasil tipu solake mangat angate, tapi limbah te angate kilau rangan samata.

¹⁸Rancana dinon hasil awi inirok bua-buah; awi te ela malalus gawi dia hapan rancana je sukup.

¹⁹Oloh je rajin manahiu oloh beken, dia tau mingkes rahasia; ela hinje dengan oloh je lalau are pander.

²⁰Oloh je manyapa oloh bakase, pambelome akan binasa kilau sumbo je belep hong alem je kaput.

²¹Ramo je solake dinon dengan bajeleng, kajariae ampie dia ie berkat.

²²Ela mambaleh kapapa dengan kapapa; percaya dengan TUHAN, Ie wei je akan mandohop.

²³Timbangan tuntang batu timbangan je dia bujur dia ingilak TUHAN.

²⁴TUHAN jari manukas jalan pambelom olon hong kalunen toh; awi te olon dia tau harati jalan pambelom ayue kabuat.

²⁵Nirok bua-buah helo bara manjanji parapah akan TUHAN. Tau ikau manyasal rahian.

²⁶Raja je pintar katawan eweh je papa; ie akan mahukum ewen tuntang jaton ampun.

²⁷Pangingat atei olon iete kalawa bara TUHAN, je mampalawa hapus huange.

²⁸Amon raja marentah hapan sinta, bujur tuntang adil, maka ie akan tetep mimbing kuasa.

²⁹Oloh tabela impaheran awi kaabase, tuntang oloh bakas ihormat awi uwae.

³⁰Aton katikae pangalaman je bapait manganan kapapa, tuntang marasih atei olon.