Read Ngaju SEWUT SALOMO 21 Bible Online

SEWUT SALOMO 21 - Ngaju bible

SEWUT SALOMO 21

¹Sama kilau TUHAN maator danum huang batang danum mangat mahasor, manumon kahandak Ayue, kalote kea Ie mangagalan tirok raja.

²Genep gawin oloh tau ingkemee bahalap hong tiroke kabuat, tapi TUHAN je manimbang kahimat ateie.

³Gawi je adil tuntang bujur labih manyanang atei TUHAN, bara kare parapah.

⁴Oloh papa te badosa, awi inguasa awi kagantong atei tuntang kajoho.

⁵Rencana ain oloh rajin mimbit hasil je malabien; gawi kajeng-kiso kajariae mawi kakurang.

⁶Panatau je dinon dengan dia bujur golong nihau tuntang mimbit oloh akan pampatei.

⁷Oloh papa dia maku manumon atoran; ie buah siksa awi kakaras ayue kabuat.

⁸Oloh sala kolak-kelok jalae; oloh je bahalap harajur bujur pambelome.

⁹Melai intu puting loteng labih sanang bara melai ije kahuma dengan sawan arep je pangalahi.

¹⁰Oloh papa harajur nahuang malalus kapapa; dengan eweh bewei ie jaton asie.

¹¹Hukum akan oloh panawah jadi ajar akan oloh je jaton pangalamae. Amon oloh je bahalap budi basarae impuji, ie akan sasar pintar.

¹²Hatalla Je Puna Adil katawan narai taloh je manjadi intu human oloh darhaka. Ie akan manambohos ewen sampai binasa.

¹³Eweh dia maku mahining auh kuntoh oloh je bara katapas dia oloh padulie amon ie kabuat balaku dohop.

¹⁴Akan mampaterai kasangit tuntang kagiri, tenga taloh panenga suni-suni.

¹⁵Amon kaadilan ilalus, maka oloh bahalap mengkeme sanang, tapi oloh papa mangkeme buah ancam.

¹⁶Oloh je dia malalus cara belom je bahalap budi basarae, batantu akan sampai akan lewun oloh matei.

¹⁷Oloh je rajin rami-rami akan tetep bara katapas; oloh je rajin belom roya-royal dia akan tau tatau.

¹⁸Amon oloh are ihukum TUHAN, dia oloh bahalap, tapi oloh papa je susah.

¹⁹Labih bahalap melai intu padang himba, bara melai dengan sawan arep je harajur bakotok tuntang sangit.

²⁰Oloh pintar harati tetep makmur tuntang tatau; tapi oloh humong manyangit mambalanja ramoe.

²¹Eweh manggau jalan mangat katetek tuntang sinta ilalus, akan dinon kasanang, hormat tuntang umur panjang.

²²Oloh je apik tuntang paceh olih marabut lewu je injaga tantara je menteng; ie manduroh kare kotae je inamam ewen.

²³Uka mahakan kasusah, keleh bua-buah dengan pander.

²⁴Oloh bajoho tuntang je manara arep rajin manyalan tuntang kurang ajar.

²⁵Oloh kadian je dia maku bagawi; mampatei arepe dengan kanahuange.

²⁶Hapus andau ie baya manirok tahiu taloh je ingahandak awie. Tapi oloh je bujur pambelome tau manenga malabien karee.

²⁷TUHAN dia mangilak parapah oloh darhaka, labi-labih amon inenga dengan kahandak je papa.

²⁸Saksi pananjaro dia akan imercaya; tapi auh oloh je katawan auh horoi kare perkara, akan inarima.

²⁹Oloh bujur percaya dengan arepe; oloh papa bakapal bau.

³⁰Jaton kapintar, pangatawan atawa kapintar kaharati je olih tahan intu taharep TUHAN.

³¹Aloh parang impahayak dengan kuda parang, je manukas kamanang iete TUHAN.