Read Ngaju SEWUT SALOMO 22 Bible Online

SEWUT SALOMO 22 - Ngaju bible

SEWUT SALOMO 22

¹Aran bahalap labih barega bara ramo je are; inyinta awi oloh labih bahalap bara inenga amas tuntang perak.

²Oloh tatau tuntang oloh je belom susah tempon ije hal je sama; TUHAN je manjapa ewen urase.

³Oloh pintar harati mahakan amon mite bahaya; oloh humong mananjong palus tuntang buah calaka.

⁴Oloh je manumon auh TUHAN tuntang mamparandah arepe, akan sanang mangat tuntang ihormat.

⁵Rangkep tuntang jabak aton hong jalan oloh je dia bujur; keleh ngejau arepm bara jete amon ikau nahuang salamat.

⁶Keleh majar ije biti anak cara belom je patut akae, palus sampai bakas ie belom kalote.

⁷Oloh je belom susah inguasa awi oloh tatau; oloh je minjam inguasa awi oloh je mahanjaman.

⁸Oloh je manawor katulas akan manggetem calaka; kajariae kuasae akan malalus taloh mana koae lilap.

⁹Oloh je bahalap atei imberkat TUHAN awi ie mambagi pangolihe dengan oloh je bara katapas.

¹⁰Keleh maharak oloh je rajin manawah; maka palus terai kapaut kabantah, terai gawi hamusoh tuntang terai gawi hasalan kolae.

¹¹Oloh je mangilak kabujur tuntang bajenta auh pandere, akan jadi sobat raja.

¹²Dengan mungkar tanjaron oloh je dia bujur, TUHAN manjaga uka pangatawan ije toto tetep ihaga.

¹³Oloh kadian rajin melai huma; ie hamauh, “Aton singa intu luar, aku tau inangkarap benteng jalan.”

¹⁴Ucok oloh bawin lontei jete jabak; oloh je eka kalait TUHAN tambohos akan huange.

¹⁵Punae bewei anak oloh mawi kare taloh je humong, tapi uei tau majar ewen mobah hadate.

¹⁶Eweh handak tatau awie mahenyek oloh je belom susah tuntang magah panenga akan oloh tatau, kajariae akan buah kapehen belom.

¹⁷Hining auhku akan majar ikau nasehat oloh pintar harati. Seneh auh ajarku.

¹⁸Ikau akan sanang amon taloh je iajarku toh iingkesm huang ateim. Karana awi te ikau jari sadia amon ikau handak mahapae.

¹⁹Aku majare akam katika toh, awi aku nahuang ikau percaya dengan TUHAN.

²⁰Telo puluh nasehat jari inyuratku akam — kare nasehat je basuang pangatawan tuntang nasehat je bahalap;

²¹tuntang je akan majar ikau narai je toto-toto bujur. Kareh amon ikau iisek, ikau tau tombah hapan jawab je buah.

²²Ela mamparugi oloh je belom susah, baya awi ie balemo; tuntang intu eka basara ela marabut hak oloh pehe.

²³Sabab, TUHAN akan mambela perkaran ewen tuntang mampatei oloh je mangapehe ewen.

²⁴Ela rampi dengan oloh je rajin sangit tuntang palait.

²⁵Kareh ikau manyonto ie, tuntang dia olih tinai ikau manganan hadat te.

²⁶Ela bajanji akan mananggong utang oloh beken.

²⁷Kareh amon ikau dia olih mambayar jete, ekam batiroh mahin induan.

²⁸Ela samasinde manindar helat petak je jari inukas awi tato hiangm.

²⁹En puji ikau mite oloh je apik malalus gawie? Oloh te akan inyoho bagawi intu istana ain kare raja, dia intu human oloh barangai.