Read Ngaju SEWUT SALOMO 23 Bible Online

SEWUT SALOMO 23 - Ngaju bible

SEWUT SALOMO 23

¹Amon ikau mondok kuman dengan ije biti oloh hai, ingat eweh ie.[7]

²Amon paham angat belaim kuman, nahan belai te.

³Ela babungo dengan panginan mangat je inyarongae, tau ie handak manjabak ikau.

⁴Ela bagawi mate-matei awi handak jadi tatau. Keleh mambalang kahandakm te.

⁵Awi, hong ije kapijep mate ih ramom tau lilap, kila-kilau ie aton palapase tuntang tarawang akan langit kilau burong nasar.

⁶Ela kuman hayak dengan oloh bisit. Ela kea mipen dengan panginae je mangat.

⁷Awi, ie akan hamauh, “Ayo kuman, nambah tinai,” padahal maksud ayue dia kalote. Nyamae manis tapi atei beken.

⁸Kareh taloh je jari inelem, iutam haluli, tuntang uras auhm je manis dengae akan ngahus bewei.

⁹Ela manasehat oloh humong; ie dia akan marega nasehatm te.

¹⁰Ela samasinde mindah helat petak waris atawa manduan petak ayun olo nole.

¹¹Awi, TUHAN pambela je abas, Ie je akan mambela ewen malawan ikau.

¹²Hining auh ajar gurum tuntang bajar sapire kaolihm.

¹³Ela langkamen majar murok anakm. Amon ikau mamukul ie hapan uei, ie dia akan matei,

¹⁴tapi ie salamat haream.

¹⁵Anakku, aku sanang toto amon ikau pintar harati.

¹⁶Aku hanjak toto amon mahining ikau mampalua auh je buah.

¹⁷Ela bahiri dengan oloh badosa. Numon harajur auh Hatalla,

¹⁸uka jaton kameles tahiu pambelom ayum je inaharepm, tuntang kaharapm dia nihau.

¹⁹Keleh hining anakku! Keleh jadi oloh pintar harati. Nantuani toto-toto caram belom.

²⁰Ela mangarait arepm dengan oloh pambusau tuntang oloh babungo,

²¹awi ewen akan jadi belom susah. Amon ikau batiroh bewei, maka dia tahi ikau akan hapakaian risai-rewei.

²²Keleh tumon auh bapam; awi, jaka dia ie, ikau jaton. Amon indum jari bakas, parahan akae je ikau marega ie.

²³Auh ajar je toto, pangatawan tahiu kapintar tuntang kaharati, pandidikan, tuntang kaharati — urase te patut imili, tapi pahalau barega akan injual.

²⁴Ije biti bapa akan hanjak amon anake bahalap budi basarae; ie akan hanjak toto amon anake pintar harati.

²⁵Keleh indu bapam hanjak dengam; keleh salamat oloh bawi je manak ikau.

²⁶Ite bua-buah tuntang nyonto pambelomku, o anakku!

²⁷Oloh bawi nakal je malontei jete rangkep je bahaya.

²⁸Ewen mimpa kilau parampok tuntang mawi are oloh hatue habandong.

²⁹En katawam taloh je manjadi dengan oloh je mihop anggor lalau karee, tuntang kinjap mangkeme taloh ihop je bahari? Oloh te susah tuntang kapehe. Ie harajur hakaridu tuntang bakotok. Matae bahandang tuntang bitie bahima-himang, padahal uras taloh te tau ihakae.

³¹Ela manalua anggor mawi ikau, aloh ampin tampayahe paham mampipen ikau tuntang ampie mangilat huang galas hayak mahasor tame paham kamangat akan huang balengkong.

³²Hanjewu jewue ikau mangkeme sama kilau jari inotok handipe tada.

³³Matam harinjet, tirokm layau tuntang nyamam kotak-bata.

³⁴Ikau mangkeme kilau aton intu lawin tihang kapal hong bentok tasik; takolokm pehe tuntang mananjong royong-rayang.

³⁵Palus ikau akan hamauh, “Ampie aku imukul tuntang inampar oloh, tapi aku dia olih mingat taloh je manjadi. Kayah aku mangantok toto! Aku perlu mihop tinai!”