Read Ngaju SEWUT SALOMO 24 Bible Online

SEWUT SALOMO 24 - Ngaju bible

SEWUT SALOMO 24

¹Ela bahiri dengan oloh papa, tuntang ela nahuang hakawal dengan ewen.

²Ewen baya manirok katulas tuntang baya manahiu taloh je mancalaka.

³Keluarga imangun hapan pangatawan tahiu kapintar tuntang kaharati tuntang kaharati.

⁴Tuntang amon aton pangatawan, maka kare kamar akan basuang sukop dengan kare ramo barega je bahalap.

⁵Oloh pintar labih hai pangarohe bara oloh gancang; pangatawan labih mambatang bara kagancang.

⁶Awi helo bara parang musti aton rancana je masak labih helo, tuntang sasar are je manasehat, sasar hai jalae tau manang.

⁷Oloh humong dia olih mangasene pangatawan tahiu kapintar tuntang kaharati. Ie dia olih omba bapander amon oloh metoh manahiu kare taloh je mambatang.

⁸Oloh je harajur marancana taloh je papa, akan inyewut oloh parusuh.

⁹Genep akal oloh humong jete dosa. Oloh je harajur manyalan oloh beken, dia irajin awi eweh bewei.

¹⁰Amon ikau nihau kaharapm hong kajake, ikau oloh je balemo.

¹¹Ela mikeh maliwus oloh je jari imutus hukum matei; keleh manyalamat oloh je kanjerae iimbit akan tihang gantongan.

¹²Tau bewei ikau hamauh, “Jete dia urusangku.” Tapi Hatalla manampayah ikau. Ie katawan tuntang mamutus pikiram. Ie mambaleh olon tumon gawie.

¹³Anakku, keleh mihop mado, awi jete bahalap. Kilau mado bara sarangan bajanyi, manis akan indu ihop,

¹⁴kalote kea pangatawan tahiu kapintar tuntang kaharati bahalap akan hambaruam. Amon ikau pintar harati, maka pambelom ayum hong andau je naharep sanang landang.

¹⁵Ela kilau oloh papa je pakat marampok oloh bujur tuntang marabut humae.

¹⁶Basa, aloh oloh bujur pire-pire tingkat manjato, harajur ie hingkat haluli. Tapi oloh papa akan lepah ramok awi calaka.

¹⁷Ela hanjak amon musohm calaka, tuntang ela tatawe amon ie manjato.

¹⁸Basa, batantu TUHAN akan mite gawim te tuntang maanggape papa, palus dia tinai mahukum musoh te.

¹⁹Ela ateim manyengkel atawa bahiri dengan oloh papa.

²⁰Oloh papa jaton aton mitong andau rahian akae tuntang jaton kaharape.

²¹Anakku, keleh mikeh TUHAN, tuntang hormat raja. Ela omba-omba oloh je malawan ewen.

²²Oloh kalote tau hancor nyalenga, awi calaka je iawi Hatalla atawa raja dia perkara korik.

²³Kare oloh pintar harati puji hamauh kalutoh: Hakim dia tau babehat silae.

²⁴Amon oloh je sala imutus dia sala, palus hakim te akan inyapa tuntang imapa awi oloh handiai.

²⁵Tapi hakim je mahukum oloh sala akan sanang tuntang ihormat.

²⁶Panombah je buah jete tanda gawi hasobat je toto.

²⁷Ela mampendeng keluargam helo bara ikau manatap tanam tuntang aton gawi.

²⁸Ela jadi saksi malawan oloh beken amon jaton bukue je patut; ela kea mananjaro tahiu te.

²⁹Ela hamauh, “Aku akan mambaleh akae taloh je jari awie dengangku!”

³⁰Puji aku mahalau tana tuntang kabon anggor oloh kadian je humong.

³¹Je gitangku hete baya onak duhi tuntang tingen. Dinding karambange mahin jadi baduroh.

³²Limbah aku mite tuntang mangumang taloh te, dinongku auh ajar toh:

³³ Dengan mangantok tuntang batiroh hanjulo, awie mangkut arepe tuntang malayan hanjulo,

³⁴katapas kakurang dumah mantakan kilau parampok je mahapan sanjata.