Read Ngaju SEWUT SALOMO 25 Bible Online

SEWUT SALOMO 25 - Ngaju bible

SEWUT SALOMO 25

¹Toh ie pire-pire nasehat beken bara Salomo je inyalinan awi kare pagawai intu istana Hiskia, raja Yuda.

²Hatalla impahai awi taloh je iingkes basilim Awie; raja ihormat awi taloh je tau inarang awie.

³Sama kilau tasik je handalem tuntang langit je gantong, tumon te kea tirok raja dia olih induga.

⁴Rasih helo perak bara puyae, harue je bahalap tau inampa awi lengen tukang amas.

⁵Keleh nyare kare panasehat papa bara istana, harue pamarentah dehen awi kaadilan.

⁶ Amon manaharep raja keleh randah atei, ela tara-tara kilau oloh je bapangkat gantong.

⁷Labih bahalap inyoho tame akan eka je labih ihormat bara inyoho manenga ekam akan oloh je labih bapangkat.

⁸Ela kajeng kiso mimbit perkara akan pangadilan; basa, harian amon ikau aton buktie sala narai tinai je tau iawim?

⁹Takian auh dengan sobatm, ngabuah baya dengae bewei, tapi rahasia ain oloh beken ela mansanae.

¹⁰Basa, kareh ikau inyewut kilau oloh je are rumbak kasingam, tuntang aram papa sampai hapus umurm.

¹¹Tirok je insanan buah katikae kilau bua amas intu mangkok perak.

¹²Tingak oloh pintar harati akan oloh je nahuang mahininge, kilau tisin amas atawa hiasan barega.

¹³Sarohan je baketep, mampahanjak oloh je manyohoe, kilau danum sadingen akan oloh manggetem hong tana.

¹⁴Kare janji je dia ilalus, kilau baunandau tuntang riwut je dia mampamohon ujan.

¹⁵Kasabar impahayak kare auh j ebajenta bajorah olih mawi oloh kuasa percaya, tuntang mampahancor uras kare je malawan.

¹⁶Ela mihop mado lalau are; kareh ikau tau lembut papa belaim.

¹⁷Ela lalau kinjap maja akan human oloh hasansila humam, kareh ie peda tuntang basingi dengam.

¹⁸Auh dawa je dia toto tau mampatei, kilau padang, tukul, atawa panah je batajim.

¹⁹Percaya dengan oloh je darhaka intu wayah kasusah, sama kilau manyipa dengan kasinge je hongge atawa mananjong hapan pai je batimpang.

²⁰Manyanyi akan oloh je kapehe atei, kilau mampalowai ie metoh kasadingen taloh kilau manusoh cuka intu himange.

²¹ Amon musohm balau pakanan ie; tuntang amon ie teah belaie, pihop ie.

²²Awi tumon te ikau mampahawen ie tuntang TUHAN akan mamberkat ikau.

²³Riwut utara batantu mimbit ujan; kalote kea mangotak manahiu oloh batantu mawi kasangit.

²⁴Melai intu serok loteng labih mangat bara melai ije kahuma dengan sawan arep je rajin hakaridu.

²⁵Manarima barita je bahalap bara lewu je kejau, kilau mihop danum sadingen metoh teah belai.

²⁶Oloh bahalap je mangalah dengan oloh darhaka, sama kilau tahasak danum je keroh atawa kalin danum je papa.

²⁷Dia bahalap mihop mado lalau are, kalote kea dia bahalap mansuman[8] are tara.

²⁸Oloh je dia tau manahan arepe kilau lewu je jari baduroh ekae batahan.