Read Ngaju SEWUT SALOMO 27 Bible Online

SEWUT SALOMO 27 - Ngaju bible

SEWUT SALOMO 27

¹ Ela mangamburau tahiu andau jewu, awi ikau dia katawan taloh je akan manjadi.

²Ela manara arepm kabuat; nauhe oloh beken je mawi taloh te, aloh je dia ikau kasenee haream.

³Batu tuntang baras te magon mahian, amon inanding dengan kapehen atei awi oloh humong.

⁴Kasangit te karas tuntang mambinasa, tapi manaharep kabeho eweh olih?

⁵Labih bahalap tingak je tara-tarang bara sinta je dia insanan.

⁶Kawal mamukul dengan sinta, tapi musoh mamalok dengan wisa.

⁷Amon besoh, mado mahin ingabele; amon balau, je bapait mahin mangat angate.

⁸Oloh je malihi humae, kilau burong je malihi sarangae.

⁹Kilau minyak je mangat ewaue tuntang dupa mampahanjak atei, tumon te kea kahalap kawal manyalawah hambaruan.

¹⁰Ela kalapean sobatm atawa sobat bapam. Huang kasusah ela balaku pandohop bara paharim; oloh hasansila humam je tokep labih baguna bara pahari je kejau.

¹¹Anakku, keleh ikau pintar harati, mangat aku sanang tuntang tau tombah amon inyalan.

¹²Oloh pintar harati mahakan amon mite bahaya; oloh humong mananjong tarus palus tuntang buah calaka.

¹³Eweh maku mananggong utang oloh beken, patut induan ramoe kilau sanda akan janjie.

¹⁴Eweh hanjewu manabe kawale dengan hai auh, itong manyapa.

¹⁵Sawan oloh je rajin hakaridu, kilau auh ujan je mohon janda-jandau.

¹⁶Dia baka tau ie inyoho suni, kilau riwut je dia tau impatende tuntang undus dia tau ingarakop.

¹⁷Kilau waja masa waja, kalote kea olon bajar bara sama arepe.

¹⁸Eweh mahaga batange, akan kuman buae. Ayang akan irega amon ie apik manyang tempoe.

¹⁹Kilau danum mamparahan kangkalingen baum, kalote kea ateim mamparahan arepm.

²⁰Intu lewun oloh matei harajur aton eka, kalote kea kanahuang olon jaton tikase.

²¹Amas tuntang perak iuji intu dapur apui; oloh kasenan bara ampie manarima auh tara.

²²Aloh oloh humong imukul manyangit, dia tau nihau kahumonge.

²³Haga meto aim bua-buah,

²⁴awi panatau dia katatahie, kuasa akan marentah mahin dia akan tetep katatahie.

²⁵Oru intu tana tuntang intu bukit inatak tuntang imumpong akan meto aim te, tapi hemben te kea lembut oru je taheta.

²⁶Bara bulun kare tabirim ikau akan mandino pakaian, bara duit regan bajual kare kambingm ikau akan tau mamili petak je taheta.

²⁷Bara kare kambingm je beken ikau tau mandino susu akam tuntang keluargam hayak kare pembantu ayum.