Read Ngaju SEWUT SALOMO 29 Bible Online

SEWUT SALOMO 29 - Ngaju bible

SEWUT SALOMO 29

¹Eweh harajur malawan amon inenga nasehat, kajariae binasa tuntang dia tau ingambuah tinai.

²Amon oloh adil marentah, rakyat hanjak. Tapi amon oloh papa mimbing kuasa, rayat kapehe.

³Eweh rajin dengan pangatawan tahiu kapintar tuntang kaharati, mampahanjak atei bapae. Eweh hinje dengan lontei ie maroyal duite.

⁴Amon je kuasa manantuani kaadilan, lewue akan dehen. Tapi amon ie mipen duit, lewue akan binasa.

⁵Eweh manara sama arepe, manenan jarat akan arepe kabuat.

⁶Oloh papa buah jarat dosae, oloh bujur hanjak tuntang sanang.

⁷Oloh bahalap katawan hak oloh randah, tapi oloh papa dia katawan jete.

⁸Oloh je rajin manggau kasalan, tau mawi karidun lewu, tapi oloh pintar mawi taloh taduh sanai.

⁹Amon oloh pintar harati tuntang oloh humong mawi perkara, oloh humong te baya mamok tuntang tatawe sampai mawi karidu.

¹⁰Oloh je bahalap ateie inyingi awi oloh je haus daha, tapi ingalindong awi oloh bahalap.

¹¹Oloh humong sangit tara-tarang, tapi oloh pintar harati sabar tuntang manahan kasangite.

¹²Amon oloh je kuasa manantuani kabar tanjaro, pagawai ayue akan jadi papa urase.

¹³Ije biti oloh je belom susah tuntang oloh je manindas ie aton kasamae; akan kadaduee te TUHAN manenga mata akan manampayah kalawan pambelom.

¹⁴Amon raja mambela hak oloh randah, banyelo-nyelo ie akan marentah.

¹⁵Ajar tuntang tingak mawi oloh jadi pintar harati. Anak je harajur inumon kahandake mampahawen indue.

¹⁶Amon oloh papa mimbing kuasa, kalangkah sasar are. Tapi oloh bujur akan sampet mite kabinasa mawi oloh papa.

¹⁷Ajar anakm, maka ie manenga taloh je taduh sanai akam, tuntang jadi ampong akam.

¹⁸Bangsa je dia ingagalan TUHAN, jadi bangsa je kontep karidu. Salamat oloh je manumon parentah TUHAN.

¹⁹Ije biti rewar dia tau iajar baya hapan kare auh. Ie haratie, tapi dia manantuanie.

²⁰Labih are kaharap akan oloh bureng, bara akan oloh je hakotak dia dengan inirok labih helo.

²¹Rewar je impamanja bara tabela, kajariae akan badungil.[9]

²²Oloh je murah sangit mawi oloh hakaridu tuntang badosa.

²³Oloh bajoho akan imparandah; oloh je randah atei akan inara.

²⁴Oloh je pakat dengan oloh panakau, rimae basingi dengan arepe kabuat. Amon ie tarus tarang intu pangadilan, ie akan ihukum. Tapi amon ie suni bewei ie akan buah sapa awi Hatalla.

²⁵Mikeh dengan tirok oloh, mawi kasusah. Percaya dengan TUHAN, maka ikau akan aman.

²⁶Are oloh rajin mamparahan baue akan oloh je mimbing kuasa, tapi je manenga taloh je adil baya TUHAN bewei.

²⁷Oloh bahalap dia sanang dengan oloh papa; oloh papa basingi dengan oloh bahalap.