Read Ngaju SEWUT SALOMO 3 Bible Online

SEWUT SALOMO 3 - Ngaju bible

SEWUT SALOMO 3

¹Ela kalapean dengan taloh je jari iajarku akam, anakku. Ingat uras parentahku,

²mangat panjang umurm tuntang sanang pambelom ayum.

³Keleh ikau tetep percaya tuntang baketep dengan Hatalla tuntang dengan sama arepm. Ingat jete tuntang ingkes huang ateim,

⁴ uka ikau ingilak tuntang irega awi Hatalla tuntang olon.

⁵Percaya dengan TUHAN dengan salepah ateim, tuntang ela manamam kaharatim kabuat.

⁶Ingat dengan TUHAN huang kare taloh je ilalusm, maka Ie mamparahan akam cara belom je bahalap.

⁷ Ela mado arepm pintar bara je sapunae; keleh manumon auh TUHAN tuntang ngejau arepm bara taloh papa.

⁸Gawim te akan jadi sama kilau tatamba akam je mampakeleh bitim tuntang mayalawah atei huangm.

⁹Keleh mahormat TUHAN dengan maluput Akae parapah je pangkahalape bara kare panatau tuntang hasil petak ayum.

¹⁰Palus kare gudang aim akan kontep gandom, tuntang danum anggor ayum akan mamujar sampai dia sukup eka akan mingkese.

¹¹ Amon TUHAN manjara ikau, anakku, terima jete kilau ije pampingat, tuntang ela ateim basingi dengan ajar Ayue te.

¹² TUHAN manjara oloh je inyintae, kilau ije bapa manjara anak je inyayange.

¹³Bontong oloh je jadi pintar harati tuntang mandino kaharati.

¹⁴Kaontonge labih hai bara je dinon bara perak, tuntang labih barega bara amas.

¹⁵Pangatawan tahiu kapaintar tuntang kaharati labih barega bara intan; uras je inggaum dia olih manyama jete.

¹⁶Pangatawan tahiu kapintar tuntang kaharati manenga akam umur panjang, panatau tuntang hormat.

¹⁷Pangatawan tahiu kapintar tuntang kaharati mawi pambelom ayum mangat tuntang sanang.

¹⁸Oloh je bahimbing dehen intu pangatawan tahiu kapintar tuntang kaharati akan mangkeme pambelom je toto tuntang sanang.

¹⁹Hapan pangatawan tahiu kapintar tuntang kaharati TUHAN manampa kalunen; dengan kaharatin Aie Ie mambirang langit intu eka Ayue.

²⁰Dengan pangatawan Aie Ie manampa kare tahasak danum hong penda petak je badarak tuntang mampalua danume; baunandau intu langit manusoh danum akan petak.

²¹Awi te imbing pangatawan tahiu kapintar tuntang kaharati tuntang tirok je handalem, anakku! Ela samasinde malapase,

²²Maka pambelom ayum akan ihaga — bahalap tuntang mimbit kasanang.

²³Ikau akan mananjong dengan aman, tuntang dia tantarang.

²⁴Ikau akan batiroh jaton angat kikeh, tuntang ikau batiroh mangat hapus alem.

²⁵Dia usah ikau mikeh dengan calaka je dumah manantekas kilau riwut barat, tuntang mantakan kare oloh papa. TUHAN akan manjaga ikau.

²⁶Ie dia manalua ikau tambohos akan huang jarat.

²⁷Amon ikau aton kaabas akan mawi kahalap dengan oloh je perlu kahalapm, ela manolak malalus taloh te.

²⁸Ela manyoho sama arepm mentai sampai jewu, amon metoh toh kea ikau tau mandohop ie.

²⁹Ela maranca taloh en-en je mamparugi sama arepm je melai tokep ikau tuntang percaya dengam.

³⁰Ela nguan auh kalahi je jaton bara buku sababe dengan oloh je dia puji mawi taloh papa dengam.

³¹Ela bahiri dengan oloh je mahapan kakaras, tuntang ela manyonto ampin gawin ewen.

³²Basa, TUHAN basingi dengan oloh je malalus kapapa, tapi Ie heret dengan oloh je belom bujur.

³³TUHAN manyapa human oloh papa, tapi mamberkat human oloh je panumon intu Ie.

³⁴ TUHAN basingi dengan oloh bajoho, tapi mamberkat oloh je randah atei.

³⁵Oloh pintar harati akan sasar basewut, tapi oloh humong sasar impahawen.