Read Ngaju SEWUT SALOMO 31 Bible Online

SEWUT SALOMO 31 - Ngaju bible

SEWUT SALOMO 31

¹Jetoh kare auh je insanan awi indu Lemuel, raja Masa akan anake.

²“Anakku, kasayangku, je inakan awiku kilau panombah akan lakudoangku. Narai je akan insanangku akam?

³Ela baranga-rangai dengan kaabasm atawa hakakanan kagancangm akan oloh bawi. Jari are raja je hancor awi oloh bawi.

⁴Ingat! Lemuel! Mihop anggor tuntang katagihan mihop taloh bahari, dia patut akan oloh je mimbing kuasa.

⁵Sabab, amon raja mihop taloh ihop bahari, ie kalapean dengan atoran tuntang dia paduli hak oloh randah.

⁶Taloh ihop bahari baya akan oloh je asi-asi tuntang kapehe atei.

⁷Ewen mihop hapa mangalapean angat je belom susah tuntang kasusah ewen.

⁸Keleh mambela ewen je dia olih mambela arepe kabuat. Ngalindong hak kakare oloh je jaton kaabase.

⁹Gau jalan akan ewen, tuntang keleh jadi hakim je adil. Keleh mangalindong hak oloh je belom susah tuntang oloh je buah henyek.”

¹⁰Sawan oloh je apik bagawi bahali inyondau; ie labih barega bara intan berlian.

¹¹Banae dia akan tapas taloh en-en, awi percaya dengae.

¹²Ie dia puji mawi kapapa dengan banae; hapus pambelome ie mawi kahalap dengae.

¹³Ie rajin mamumpong talin rami tuntang bulun tabiri; palus deroh bagawi manantange.

¹⁴Bara kejau ie mameteh panginan, kilau je ilalus awi kare kapal dagang.

¹⁵Susong hanjewu ie misik uka manatap panginan akan keluargae, tuntang mambagi-bagi gawi akan kare pembantue.

¹⁶Ie manggau ije karambar petak palus mamilie; ie mahaga ije kabon anggor bara pangolihe.

¹⁷Ie manatap arepe akan bagawi salepah kaabase.

¹⁸Ie katawan uras taloh je ilaluse, mampaontong; ie bagawi sampai gantong alem.

¹⁹Lawai inalie tuntang benang inantange.

²⁰Ie dia bukih dengan oloh je belom susah; ie masi oloh je perlu pandohop.

²¹Ie dia mikeh amon wayah sadingen dumah, awi baju bakapal jari sadia akan keluargae.

²²Ie kabuat je manampa parmadani; pakayae bara lena ungu je bahalap.

²³Banae oloh basewut — ije bara kare pamimpin intu lewu.

²⁴Ie manampa pakaian tuntang panding palus manjuale akan oloh dagang.

²⁵Ie bapangaruh tuntang ihormat, tuntang dia gaer dengan andau harian.

²⁶Dengan kajentae ie hakotak; kare auhe pintar harati.

²⁷Ie harajur rajin bagawi tuntang manantuani urusan huma seroke.

²⁸Ie irega awi kare anake, tuntang inara awi banae.

²⁹“Aton are oloh bawi je bahalap,” koan banae, “tapi ikau je paling bahalap akan ewen samandiai.”

³⁰Ampin bau je manis dia olih imercaya, tuntang kabungas akan lilap; tapi oloh bawi je manempo TUHAN patut mandino tara.

³¹Keleh mambaleh kare kahalape; ie oloh bawi je patut ihormat intu hete-hete!