Read Ngaju SEWUT SALOMO 4 Bible Online

SEWUT SALOMO 4 - Ngaju bible

SEWUT SALOMO 4

¹O, kare anak oloh, hining auh ajar bapam! Lalus jete, te ikau akan mandino kaharati.

²Je iajarku akam toh bahalap, awi te ela ikau manawahe.

³Metoh aku magon korik, anak tonggal oloh bakasku,

⁴aku iajar awi bapaku. Ie hamauh, “Ingat kare auh ajarku, ela samasinde mangalapeae. Lalus kare atohku, uka pambelom ayum sanang.

⁵Keleh jadi pintar harati tuntang paham pintar! Ingat harajur dengan kare auh ajarku tuntang ela manganae.”

⁶Keleh marega pangatawan tahiu kapintar tuntang kaharati, maka ie te akan mangalindong ikau; sinta ie, te ie akan manjaga ikau uka ikau tetep aman.

⁷Taloh mambatang je pangkasolake ilalusm iete uka jadi pintar harati. Narai bewei je inggoangm, je mambatang, iete gau kaharati.

⁸Keleh mampagantong pangatawan tahiu kapintar tuntang kaharati, palus ikau akan impagantong awie. Malok ie, maka ie mimbit hormat akam.

⁹Ie akan manenga akam saling kambang je bahalap akan jadi makotam.

¹⁰Hining auhku, anakku! Nantuani bua-buah kare nasehatku, maka umurm akan panjang.

¹¹Aku jari majar pangatawan tahiu kapintar tuntang kaharati akam, tuntang maninjok cara belom je buah.

¹²Amon ikau belom tumon te, maka ikau dia akan dinon halangan amon mananjong, tuntang dia akan tantarang katika hadari.

¹³Ingat harajur ajar je jari inarimam bara aku. Haga jete bua-buah, awi dengan ajar te pambelom ayum akan bahasil.

¹⁴Ela manumon cara belom oloh papa, tuntang ela manyonto gawin ewen.

¹⁵Ela mananture ewen. Ngejau arepm bara ewen tuntang rajur tanjongm!

¹⁶Oloh papa dia tau batiroh amon hindai mawi kapapa. Ewen dia mangantok sahelo bara mancalaka oloh beken.

¹⁷Kapapa tuntang gawi je hapan kakaras, kilau panginan tuntang taloh ihop akan ewen.

¹⁸Jalan oloh papa kaput kilau kakaput alem. Ewen dia katawan arepe tantarang tuntang manjato. Kabalikae, jalan je ihoroi oloh bahalap kilau matanandau lembut; sasar tahi sasar balawa, sampai kajariae jadi balawa haliai.

²⁰Keleh manantuani kare auhku anakku! Hining kare nasehatku.

²¹Ela manganae, malengkan ingkes harajur huang ateim.

²²Oloh je kasene jete akan belom tuntang barigas.

²³Jaga ateim bua-buah, awi ateim manukas jalan pambelom aim.

²⁴Ela samasinde mangotak taloh je dia toto. Keleh mangejau arep bara kare auh tanjaro tuntang kare auh je tantai akan mampalayang oloh.

²⁵Keleh ampin baum mamparahan kabujur ateim; dia usah ikau mawi langkasam kila-kilau jaka aton bajai penda batang.

²⁶ Keleh nirok bua-buah helo bara ikau nguan gawim, maka ikau akan mandino hasil huang kare gawim.

²⁷Keleh mangejau arepm bara taloh je papa, tuntang keleh belom bujur. Ela samasinde mahiwang bara jalan je buah.