Read Ngaju SEWUT SALOMO 5 Bible Online

SEWUT SALOMO 5 - Ngaju bible

SEWUT SALOMO 5

¹Anakku, hining auhku! Keleh nantuani kapintar kaharatingku tuntang kaharati je iajarku akam,

²uka ikau katawan kilen ampie ikau maharagu arepm tuntang hakotak kilau oloh je aton pangatawae.

³Oloh bawi nakal,[1] nyamae kamanis mado tuntang kare auhe manyanang atei.

⁴Tapi amon taloh samandiai jari mahalau, je tapalihi baya kasusah tuntang kapehe.

⁵Ikau injijit awie mohon akan lewun oloh matei; jalan je inyoroe manintu pampatei.

⁶Ie dia tetep intu jalan je manintu pambelom; ie dia katawae je jalae te jari mahiwang bara jalan jete.

⁷Awi te, anak oloh, hining kare auhku tuntang ela manaluae.

⁸Keleh ngejau arep bara oloh bawi je kilau te! Ela manokep humae.

⁹Amon ikau hinje dengan oloh bawi te, ikau akan nihau hormatm. Hambaruam akan irunap hong katabelam awi oloh je dia kasene asi.

¹⁰Panataum akan lepah kinan oloh beken, tuntang pangolihm jadi bagin oloh je dia ikau kasenee.

¹¹Kajariae ikau manarahing, amon bitim lepah kinan panyakit.

¹²Palus ikau hamauh, “Mbuhen aku basingi dengan nasehat? Mbuhen aku dia tau iningak?

¹³Aku dia maku mahining kare auh gurungku tuntang dia maku manumon tingak ewen.

¹⁴Salenga ih aku jari[2] jaton bara rega intu matan oloh are.”

¹⁵Tagal te, baketep dengan sawam kabuat tuntang tenga sintam akae bewei.

¹⁶Jaton gunae ikau manggau kamangat dengan oloh je dia sawam.

¹⁷Kamangat te tantai akam dengan sawam, dia dengan oloh beken.

¹⁸Awi te keleh ikau manggau kasanang dengan sawam kabuat; gau kamangat dengan oloh bawi je jari ikau kawin dengae —

¹⁹oloh bawi bahalap tuntang bapitik kilau bajang. Nauh kahalap biti berenge harajur mawi ikau leket tuntang sintae mambusau ikau.

²⁰Narai gunae nahuang dengan oloh bawi beken, anakku? Akan narai ikau rampi dengan oloh bawi nakal?

²¹TUHAN mite uras taloh je iawi olon. Akan kueh bewei olon haguet, TUHAN manantuanie.

²²Dosan oloh papa kilau parangkep je manjarat oloh te kabuat.

²³Ie matei awi dia manarima nasehat. Kaburenge mimbit ie akan kabinasa.