Read Ngaju SEWUT SALOMO 8 Bible Online

SEWUT SALOMO 8 - Ngaju bible

SEWUT SALOMO 8

¹ Hining! Kapintar kaharati mantehau, tuntang pangatawan tahiu kapintar tuntang kaharati mambo auhe.

²Ie mendeng intu kare bukit hong saran jalan, tuntang intu kare simpang jalan.

³Intu lawang, hong jalan tame akan lewu, intu hete tarahining auhe.

⁴“O, ungkup oloh kalunen aku mantehau keton; genep bitin olon hong hunjun petak, seneh auh lakungku!

⁵Keton je hindai are pangalaman, keleh bajar mandino tirok je handalem; keton je badungil, keleh bajar mangasene arep.

⁶Seneh kare auhku, awi uras te buah tuntang barega.

⁷Je insanangku buah urase, awi aku basingi dengan tanjaro.[4]

⁸Kare auhku te bujur urase, jaton je habambilit tuntang sala.

⁹Akan oloh je sondau kaharati, auhku toto, akan oloh are pangatawae, auhku buah.

¹⁰Keleh marega nasehatku labih bara perak asli, pangatawan imerlu labih helo bara amas tulen.

¹¹Aku toh pangatawan tahiu kapintar tuntang kaharati, labih barega bara berlian; dia tau inanding dengan en bewei je ingahandakm.

¹²Aku toh pangatawan tahiu kapintar tuntang kaharati; hong aku aton pengesene, kapintar kaharati, tuntang pangatawan.

¹³Mahormat TUHAN rimae basingi dengan kapapa; aku dia mangilak kajoho tuntang kalecak. Aku basingi dengan hadat je papa tuntang kare auh kotak tanjaro.

¹⁴Aku je manenga tirok. Tuntang aku kea malaluse jete. Aku pintar tuntang abas kea.

¹⁵Kare raja indohopku malalus gawi marentah, kare oloh kuasa indohopku mampendeng kaadilan.

¹⁶Awi kahalap gawingku kare oloh hai tuntang oloh utus gantong marentah tuntang malalus kaadilan.

¹⁷Aku sinta ewen je rajin dengangku; je manggau aku akan sondau aku.

¹⁸Intu aku are panatau tuntang kea hormat tuntang kasanang belom.[5]

¹⁹Je dinom bara aku labih bara amas tulen. Labih barega bara perak asli.

²⁰Aku manuntut jalan katetek, aku mananjong intu jalan kabujur.

²¹Oloh je sinta aku impatatauku, ingontepku humae dengan ramon panatau.

²² Aku inampa TUHAN kilau je solake, aku toh hasil gawin Aie je solake metoh jaman horan.

²³Aku inampa bara tamparan jaman, intu tamparae helo bara kalunen injapa.

²⁴Aku inakan helo bara injapa tasik lombah, helo bara kare tahasak danum lembut.

²⁵Aku inakan helo bara kare bukit impendeng, helo bara kare lungkoh imangun,

²⁶helo bara TUHAN manjapa kalunendengan kare padange je lombah, helo haream bara Ie manampa kumpal petak je solake.

²⁷Aku manyaksie metoh langit imbirang, tuntang manggaris pain langit hunjun tasik

²⁸metoh TUHAN mandak baunandau hong langit, tuntang muap kare eka mingkes danum je balua akan tasik.

²⁹Metoh Ie marentah danum tasik, uka ela mahalau tikas ayue. Aku mahin aton intu hete metoh galang petak iandak Awie.

³⁰Aku aton intu balikat Aie kilau anak je eka sintan Ayue; genep andau aku je manyanang Ateie; harajur aku bangang intu taharep Aie.

³¹Aku harajur sana-sanang intu hunjun petak je injapa Awie, tuntang mangkeme sanang marak olon.

³²Awi te hining auhku, o oloh tabela! Numon atohku maka ikau akan sanang.

³³Keleh manarima nasehat tuntang keleh jadi pintar harati, ela ikau manawahe.

³⁴Salamat oloh je mahining auhku, je genep andau mondok mentai intu bauntonggang humangku, tuntang jaga-jaga intu lawang ekaku.

³⁵Eweh mandino aku, ie sondau pambelom, TUHAN mangilak ie.

³⁶Eweh dia sondau aku, ie mamparugi arepe kabuat; oloh je basingi dengangku, sinta pampatei.”