Read Ngaju PANGABAR 1 Bible Online

PANGABAR 1 - Ngaju bible

PANGABAR 1

¹Kare auh hong buku toh dumah bara Pangumang, anak Dawid, raja intu Yerusalem.

²Pangumang hamauh: Urase hayang tuntang dia baguna! Belom te ngahus, uras jaton rimae.

³Hapus pembelom itah bagawi, mahantis ebes. Tapi, kueh hasile je tau itah mampatamame?

⁴Turonan je ije lembut tuntang turonan je beken lilap, tapi kalunen tetep sama bewei.

⁵Matanandau magon lembut, tuntang magon kea belep. Sambil heka ie haluli akan ekae solake, palus lembut tinai.

⁶Riwut manampur akan salatan, palus akan utara; ie kules puter, palus haluli tinai.

⁷Uras sungei mahasor akan tasik, tapi tasik dia tau kontep. Danume haluli akan hila ngaju sungei, palus nampara mahasor tinai.

⁸Uras mambisau tuntang kabisau te dia tarasanan. Matan itah dia tau peda manampayah; pinding itah dia tau ombet mahining.

⁹Taloh je puji manjadi, kareh manjadi tinai. Taloh je puji ilalus, kareh ilalus tinai. Jaton taloh je taheta hong kalunen toh.

¹⁰Aton oloh je hamauh, “Ite, jetoh taheta!” Tapi jete jari aton sahelo bara itah inakan.

¹¹Oloh dia mingat taloh hong katika je halau. Tumon te kea taloh metoh toh tuntang kareh, dia baka iingat awi oloh intu katika je harian.

¹²Aku, Pangumang, marentah intu Yerusalem kilau raja akan Israel.

¹³Aku bahimat uka mite tuntang bajar hapan kapintar kaharati taloh je manjadi hong kalunen toh. Kajarian pambelom je inyadia Hatalla akan itah puna mangapehe atei.

¹⁴Aku jari mite hapus gawin oloh intu kalunen toh. Percaya bewei, urase te hayang, kilau manggoang riwut.

¹⁵Je bingok dia tau imbujur, tuntang taloh je jaton dia tau iise.

¹⁶ Tirokku, “Aku toh jadi oloh pintar, kejau labih pintar bara hapus oloh je marentah intu Yerusalem helo bara aku. Aku mamumpong are kapintar tuntang pangatawan.”

¹⁷Maka aku bahimat uka mangatawan kabeken pangatawan tuntang kahumong, kapintar kaharati tuntang kabureng. Tapi ampie aku toh kilau manggoang riwut bewei.

¹⁸Awi sasar are pangatawan tahiu kapintar kaharatin itah, sasar are kea kameles itah. Sasar are pangatawan itah, sasar are kasusah itah.