Read Ngaju PANGABAR 11 Bible Online

PANGABAR 11 - Ngaju bible

PANGABAR 11

¹Keleh mangguna duitm hapa badagang intu tanah luar. Ikau pasti mandino ontong harian andau.

²Keleh mahapan duitm te omba badagang dengan pire-pire gawin satiar keleh manggau gawin satiar sapire karee je tau. Basa oloh perlu barendeng, helo bara calaka dumah.

³Akan hila kueh bewei batang kayu te balongkang, tetep halelek intu ekae balongkang. Amon baun andau basuang danum sampai sarat, ujan balalu mohon akan petak hayak labat.

⁴Eweh mentai sampai riwut tuntang langit barasih, dia akan mimbul tuntang dia kea mamutik hasile.

⁵Hatalla manampa taloh samandiai, tuntang olon dia olih harati gawin Aie; kalote kea ie dia olih harati palembut pambelom je taheta intu huang kanain ije biti indu.

⁶Keleh manawor binyim hanjewu tuntang ela tende katika hamalem. Awi itah dia katawan tawor binyi je kueh je bahalap pambelome. Tau kea kadadaee belom bahalap.

⁷Kalawan matanandau mawi kasanang; dia lue-luen kasanange amon tau mangkeme kamangate.

⁸Keleh ikau manarimakasih amon umurm mandahang. Tapi ingat, aloh ikau belom tahi hong kalunen, katikam intu lewun oloh matei magon labih tahi hindai. Jadi, narai je handak iharap tinai? Urase ngahus tuntang hayang.

⁹Keleh pamangat arepm, o oloh tabela intu wayah katabelam. Keleh hanja-hanjak katahin ikau magon bujang. Lalus kare kanahuang hambaruam, lalus uras kahimat ateim. Tapi ingat, Hatalla je aton huang sorga, kareh mahakim uras kare taloh gawim.

¹⁰Keleh manganan kikeh tuntang kasusah bara ateim, awi wayah katabelam golong mahalau.