Read Ngaju PANGABAR 2 Bible Online

PANGABAR 2 - Ngaju bible

PANGABAR 2

¹Aku manukas handak manyanang arepku bewei uka mangatawan narai je inyewut kasanang. Tapi ampie jete kea hayang.

²Aku maharati tahiu tatawe jete kahumong tuntang kasanang je jaton gunae.

³Inantiring awi kanahuangku handak jadi oloh pintar harati, aku himat ateiku uka hanja-hanjak dengan mihop anggor tuntang pesta barami-rami. Aku madoe jete wei cara je pangkahalape akan olon mangat mangkeme kamangat katahin pambelome je pandak hong kalunen toh.

⁴ Kare gawi hai jari ilalusku. Aku mamangun kare huma akan arepku. Aku manampa kare kabon kambang tuntang kare kabon je imbulku dengan batang anggor tuntang kare macam batang bua.

⁶Aku mangali kare talaga hapa mambisa kare kabon kambang tuntang kare kabon bua te.

⁷ Ayungku are jipen, aloh je imiliku, atawa je inakan intu humangku. Meto aingku kejau labih are bara kare meto ain eweh bewei je puji melai intu Yerusalem.

⁸ Aku mamumpong perak tuntang amas hasil panenga bara kare raja intu kare lewu je inguasa awiku. Tukang panyanyi hatue tuntang bawi manyanang ateiku dengan kare nyanyin ewen. Aku tempon gundik pire bewei karee tumon kahandakku.

⁹ Toto, aku labih hai bara eweh bewei je puji melai intu Yerusalem, tuntang pangatawangku tahiu kapintar kaharati kea mahin labih gantong.

¹⁰Aku mameda arepku dengan narai bewei je eka kanahuangku. Dia puji aku manyarenen belaiku amon aku handak mangkeme kamangat narai bewei. Aku tamam angatku tagal kare hasil kahekaku, tuntang jete upahku.

¹¹Tapi limbah te iriksaku kare gawingku, tuntang kea kare kahekaku akan mampahapus kare gawi te, maka aku katawan je kare taloh te uras jaton rimae. Gawingku te hayang sama kilau manggoang riwut bewei.

¹²Aloh kilen ampie kea ije biti raja baya tau malalus taloh je jari ilalus awi kare raja je helo bara ie. Palus aku nampara manirok: Narai rimae jadi pintar harati atawa humong?

¹³Puna, aku katawan, “Kapintar kaharati labih bahalap bara kahumong, sama kilau kalawa kea labih bahalap bara kakaput.

¹⁴Oloh pintar harati tau mite taloh je inintue; oloh humong sama kilau mananjong gaya-gayap.” Tapi aku katawan kea kajarian kakare taloh je buah ewen te sama bewei.

¹⁵Palus tirokku, “Kajarian taloh je buah oloh humong kareh ingkemeku kea. Jadi, narai gunae pangatawan tahiu kapintar kaharatingku?” Balalu aku manduan kasimpulan je pangatawan tahiu kapintar kaharati te jaton gunae samasinde.

¹⁶Oloh je humong jeleng ingalapean, tapi oloh je tempon kapintar karati kea mahin dia ingenang. Sasar miar andau itah handiai uras nihau bara pangingat. Itah uras akan matei, aloh oloh je harati kalote kea oloh je bureng.

¹⁷Awi te belom toh jaton rimae tinai akangku, beken bara te jaton. Urase hayang; aku jari manggoang riwut bewei.

¹⁸Kare hasil gawingku tuntang pangolihku akan jaton gunae akangku, awi aku musti malihie akan oloh je mangganti aku.

¹⁹Tuntang eweh katawae en ie harati atawa humong? Tapi aloh kilen ampie ie jari tempon hasil gawingku je jari dinongku katahin pambelomku hong kalunen toh, tagal kaheka tuntang pangatawan tahiu kapintar kaharatingku. Jadi, jete kea hayang.

²⁰Toh aku manyasal jari bagawi kalote kakakarse.

²¹Awi olon bagawi babehat mahapan pangatawan tahiu kapintar kaharati, pangatawan tuntang kaapike mandino taloh en-en. Tapi kajariae ie akan malihi hasil pantis ebese akan oloh je samasinde dia balua ebese akan jete. Jadi, jete kea hayang, tuntang dia adil samasinde!

²²Hapus pambelome olon bagawi babehat tuntang heka-heka; palus kueh hasil kahekae je tau ie mampatamame?

²³ Narai bewei je ilaluse katahin pambelome, mawi kasusah tuntang kapehen ateie. Hamalem mahin ateie bagisah. Jadi, samandiaie te hayang samasinde.

²⁴ Jaton je labih bahalap akan olon beken bara kuman, mihop tuntang mangkeme hasil gawie. Aku kasene jete kea panengan Hatalla.

²⁵Eweh je tau kuman tuntang hanja-hanjak dia dengan Hatalla?

²⁶ Hatalla manenga pangatawan tahiu kapintar kaharati, pangatawan tuntang kasanang akan oloh je mampahanjak atei Ateie. Tapi oloh badosa inyoho bagawi manggau pangolih tuntang manawon hasile akan injulok akan oloh je mampahanjak atei Hatalla. Jadi, samandiai te hayang kilau gawin satiar manggoang riwut.