Read Ngaju PANGABAR 3 Bible Online

PANGABAR 3 - Ngaju bible

PANGABAR 3

¹Kare taloh handiai hong kalunen toh uras manjadi intu katika je inukas awi Hatalla.

²Hatalla manukas katikae akan oloh uka manak tuntang katika uka malihi kalunen, katika akan mimbul tuntang katika akan manjawut,

³katika akan mampatei tuntang katika akan mampakeleh, katika akan mangarak tuntang katika akan mamangun.

⁴Hatalla manenga katika akan manangis tuntang katika akan tatawe, katika akan manatum tuntang katika akan manari,

⁵katika akan mahajip tuntang katika akan pali mahajip, katika akan mamalok tuntang katika akan manahan arep.

⁶Hatalla manukas katika akan mandino tuntang katika akan nihau, katika akan manabung tuntang katika akan mambalanja,

⁷katika akan marabit tuntang katika akan mitor, katika akan suni tuntang katika akan hakotak.

⁸Hatalla manukas katika akan sinta tuntang akan basingi, katika akan parang tuntang katika akan badamai.

⁹Narai hasil kare kahekan itah?

¹⁰Aku katawan Hatalla manenga tanggongan je babehat akan itah.

¹¹Ie manukas katika je buah akan taloh samandiai. Ie manenga akan itah kanahuang akan mangatawan andau harian; tapi itah dia olih harati gawin Hatalla bara tamparae sampai kahapuse.

¹²Aku katawan akan itah jaton je labih bahalap bara kahanjak tuntang mangkeme angat kasanang belom hapus umur itah.

¹³Keleh itah urase kuman mihop tuntang mangkeme hasil gawin itah. Jete panengan Hatalla.

¹⁴Aku katawan uras gawin Hatalla tetep aton sampai katatahie. Olon dia tau mandahang tuntang mangurange. Tuntang Hatalla mawi itah kalote uka itah mikeh dengae.

¹⁵Taloh je manjadi metoh toh, jari manjadi helo bara toh. Je kareh aton, jari tahi aton. Hatalla manukas uka je jari manjadi, manjadi tinai.

¹⁶Aton tinai je gitangku hong kalunen toh: hong kueh aton kaadilan tuntang kahalap, intu hete aton kapapa.

¹⁷Aku madoe, Hatalla akan mamutus oloh je bahalap atawa oloh je papa, awi genep hal tuntang genep gawi manjadi intu katika je inukas Hatalla.

¹⁸Kasimpulan bara aku iete: Hatalla mariksa itah uka mamparahan kajarian itah dia hakabeken bara kajarian meto.

¹⁹Aloh kilen ampie kajarian olon tuntang kajarian meto sama. Je ije akan matei, kalote kea je beken. Kadaduee te sama-sama taloh belom, jadi olon dia labih ontong bara meto, awi akan due-due te pambelom toh hayang.

²⁰Ewen manintu eka je sama. Ewen bara tonek petak tuntang kareh haluli akan tonek petak.

²¹Itah dia katawan en roh olon mandai akan hunjun tuntang roh meto mohon akan huang petak.

²²Awi te aku mangatawan iete jaton je labih bahalap akan olon beken bara mangkeme angat hasil gawie. Beken bara te jaton je tau ilaluse. Dia badai ie katawan narai je manjadi limbah ie matei.