Read Ngaju PANGABAR 4 Bible Online

PANGABAR 4 - Ngaju bible

PANGABAR 4

¹Limbah te aku manampayah tinai kare taloh je dia adil je manjadi hong kalunen toh. Kare oloh je ihenyek manangis, tuntang jaton ije je maku mandohop ewen. Jaton ije je maku mandohop, awi kare oloh je mahenyek te tempon kuasa je hai.

²Aku bahiri mingat kare oloh je jari tahi matei, awi ewen labih sanang bara kare oloh je magon belom.

³Tapi je labih sanang tinai iete kare oloh je hindai inakan, awi ewen hindai mite kapapa je ilalus hong kalunen toh.

⁴Aku katawan kea tahiu olon je paham bagawi babehat, baya awi bahiri mite hasil gawin oloh beken je tokep ekae. Uras taloh te hayang kilau gawi manggoang riwut.

⁵Koan oloh, baya oloh humong bewei je mamangkut arepe tuntang manalua arepe matei balau.

⁶Tau jete toto, tapi labih bahalap isut panatau impahayak atei je tadoh sanai bara bagawi babehat mahapan due lenge tuntang manggoang riwut.

⁷Magon aton tinai je hayang hong pambelom toh.

⁸Aton oloh je belom ngabuat jaton anake, atawa paharie. Aloh kalote ie bagawi mate-matei raju-rajur tuntang ateie dia puji ombet huange dengan kare panataue. Akan eweh ie kisa-kisai tuntang mangabele kare kasanang? Jete kea hayang tuntang ije cara belom je kapehe.

⁹Badue labih ontong bara kabuat. Amon ewen bagawi, hasile kareh labih bahalap.

¹⁰Amon ije biti balawo ije beken kareh tau mandohope. Tapi amon ije biti balawo, padahal ie mangabuat, calaka ie, awi jaton je tau mandohop ie.

¹¹Intu alem je sadingen, due biti hadarah tau hakalasot. Tapi kilen ampie oloh tau balasot amon kabuate?

¹²Due biti je haguet hayak tau manangkis oloh je manyarang, tapi oloh je kabuat murah impakalah. Telo tali je injalin jadi ije, bahali inggeto.

¹³Oloh je belom susah tau jadi raja, tuntang ije biti oloh tawanan tau bindah akan hunjun padadusan. Tapi amon hong umur kabakase raja te lalau humong akan manarima kare pampingat, maka kajariae labih papa bara oloh tabela je belom susah tapi pintar.

¹⁵Aku manirok tahiu oloh hong kalunen toh, palus aku katawan je marak ewen batantu aton ije biti oloh tabela je akan mangganti raja.

¹⁶Rayat je imimpin awie dia taraise karee, tapi limbah ie haguet, jaton je manarimakasih mingat kahalap gawie. Punae, urase hayang kilau gawi manggoang riwut.

¹⁷Keleh bua-buah amon handak haguet akan Human Hatalla. Labih bahalap haguet akan hete uka bajar bara ikau maluput parapah, sama kilau je ilalus awi kare oloh humong. Ewen dia tau mangabeken kueh je bujur kueh je sala.