Read Ngaju PANGABAR 5 Bible Online

PANGABAR 5 - Ngaju bible

PANGABAR 5

¹Keleh nirok bua-buah belo bara bapander, tuntang ela lalau jeleng hajanji dengan Hatalla. Ie aton hong sorga tuntang ikau aton hong kalunen, jadi keleh bukih dengan auhm.

²Sasar gogop, sasar hai jalae ikau dinon nupi je papa. Sasar are bapander, sasar hai jalae tau mampalua kare auh kahumong.

³Jadi, amon ikau hajanji dengan Hatalla, lalus bajeleng. Ie dia rajin dengan oloh je mawi kahumong. Awi te, lalus janjim.

⁴ Labih bahalap dia hajanji bara hajanji tapi dia malaluse.

⁵Ela kare kotakm mawi ikau badosa, sampai ikau tarapaksa mansanan akan imam je manyang TUHAN, tahiu ikau je salaya mansanan janji. Akan en mawi Hatalla sangit dengam sampai Ie mahancor hasil gawim?

⁶Sama kilau tapaare nupi te jaton rimae, kalote kea are pander jaton gunae. Tapi keleh mikeh dengan TUHAN.

⁷Ela hengan amon mite oloh je kuasa mahenyek oloh je belom susah, marabut hak ewen tuntang dia manenga akan ewen taloh je adil. Genep pagawai ingalindong awi kapalae tuntang kadaduee ingalindong tinai awi pagawai je labih gantong tinai pangkate.

⁸Tinai pambelom raja kea mahin bagantong bara hasil tana.

⁹Oloh je mipen duit, dia puji sukop duite; oloh je gila panatau, dia puji ombet huange dengan kaontong. Uras jete hayang.

¹⁰Sasar are panatau oloh sasar are kea nyama je impakanae. Jaton kaontong akan je tempoe, ie baya katawan ie tatau.

¹¹Ije biti oloh je gawie duan upah tau dia sukup panginan, tapi sadia-diae ie tau batiroh mangat. Katambalike ije biti oloh tatau panataue paham are, sampai ie dia tau mangat tirohe awi harajur mangkeme kameles.

¹²Gitangku hong kalunen toh taloh je mangapehe atei: Ije biti oloh manawon panatau akan wayah katapas.

¹³Tapi panatau te nihau awi wayah calaka, sampai jaton je tau iwarise akan kare anake.

¹⁴Itah inakan halowai; kalote kea itah malihi kalunen toh, dia mimbit en-en bara hasil kaheka itah.

¹⁵ Jete paham mangapehe atei. Itah haguet kilau itah metoh toh dumah. Itah heka-heka akan manggoang riwut, tuntang narai hasile?

¹⁶Katahin belom itah gaya-gayap hong kakaput, itah heka-heka, meles, manyengkel tuntang kapehe atei.

¹⁷Palus aku katawan iete je paling bahalap akan itah iete kuman, mihop tuntang mangkeme kamangat hasil gawin itah katahin pambelom itah je pandak je inenga TUHAN akan itah, jete kajarian itah.

¹⁸Amon ije biti oloh manarima panatau tuntang ramo bara Hatalla, tuntang ie inyoho mangkeme kamangat panatau te, ie patut manarimakasih tuntang mangkeme hasil gawie. Jete kea panengan Hatalla.

¹⁹Hatalla mangontep atei oloh te dengan kahanjak, maka Ie dia mikeh mangenang tahiu kapandak pambelom toh.