Read Ngaju PANGABAR 6 Bible Online

PANGABAR 6 - Ngaju bible

PANGABAR 6

¹Gitangku tinai taloh je dia adil je paham mahenyek olon hong kalunen toh.

²Aton katika Hatalla manenga panatau, hormat tuntang ramo akan oloh, sampai jaton tinai kahandake mipen taloh. Tapi Hatalla dia manyoho ie mangkeme kamangat bara kakare panenga te. Katambalike oloh je dia Ie kasenee mangkeme kamangat panatau te. Jadi, uras taloh te hayang tuntang mangapehe atei.

³Aloh oloh tempon saratus anak tuntang belom tahi sampai bakas, tapi amon ie dia mangkeme sanang tuntang dia kea ingubur tumon kapatut, maka manumon tirokku, awau je matei metoh inakan labih bahalap kajariae bara oloh te.

⁴Awi akan awau te dia jadi soal en ie inakan atawa dia; ie haguet akan kakaput palus bajeleng ingalapean.

⁵Hindai puji ie mite kalawan matanandau, tuntang ie kea hindai harati narai pambelom toh, sampai ie tau menter dengan kasanang.

⁶Tuntang jete labih bahalap bara oloh je belom saratus nyelo, tapi dia puji sanang. En dia kadaduee te haguet akan eka je sama kea?

⁷Olon bagawi baya mangat ie kuman, tapi ie dia puji ombet huange.

⁸Jadi, narai kaontonge oloh harati dengan oloh humong? Akan en kea amon oloh je belom susah mawi langkasae bahalap intu marak kare rayat?

⁹Uras te hayang kilau gawi manggoang riwut. Labih bahalap itah sukop dengan je aton intu itah bara harajur mipen je labih are tinai.

¹⁰Uras taloh je aton, jari tahi aton. Itah katawan olon dia olih mambantah auh oloh je labih abas bara ie.

¹¹Sasar tahi ie dia manumon sasar jaton rimae kare auhe. Ie dia mandino kaontong en-en haream.

¹²Kilen ampie oloh mangatawan narai je paling bahalap akae hong pambelome je pandak tuntang dia baguna, tuntang je mahalau kilau kangkalingen? Kilen ampie oloh tau harati narai je manjadi hong kalunen toh limbah ie jaton?